Көслө рухлы һәм изге күңелле

Оло Ыҡтамаҡтан Гөлназ Пастухова – ауыл ерендә тыуып үҫкән һәм уны йәшәтеүгә өлөш индергән шундай көслө рухлы, асыҡ күңелле, мөләйем гүзәл заттарҙың береһе.
Ул Әжекәй ауылында донъяға килгән. Ишле ғаиләлә иң өлкәне булараҡ, бала сағынан эшкә күнегеп үҫә, ата-әсәһенең өй һәм хужалыҡ буйынса төп ярҙамсыһы була. Мәктәпте тамамлағандан һуң, Дыуан ауыл хужалығы техникумына уҡырға инә. Студент йылдарында активистар рәтендә йөрөй: ансамблдә сығыш яһай, спорт ярыштарында ҡатнаша. Ятаҡта йәшәй, шул уҡ ваҡытта, бер аҙ булһа ла аҡсаһы килер тип, дөйөм ятаҡта мейес яғыусы булып урынлаша.
Йәшлек йылдарында буласаҡ тормош иптәшен осратып, кейәүгә сыға. Пастуховтар улдары Дмитрийға ғүмер бүләк итә. Әммә ғаилә тормошо яйға һалынмай. Ҡатын тыуған районына ҡайтып, Оло Ыҡтамаҡ ауылының ветеринария-бактериология лабораторияһына эшкә урынлаша. Бер нисә йылдан һуң был вазифа ҡыҫҡартыла, шул саҡта йәш әсә бәләкәй балаһы менән Өфө ҡалаһына йәшәргә китә. Ул улының һәм ата-әсәһенең бер нәмәгә лә мохтаж булмай йәшәүен теләй, шуға күрә һәр эшкә ризалаша: келәт мөдире була, ә кисен ҡала урамының таҙалығын тәьмин итеүгә үҙ өлөшөн индерә. Күберәк ваҡытын яҡындары янында үткәреү өсөн ул хатта ҡан тапшыра – бының өсөн өҫтәмә ял көндәре бирелә.
Гөлназ Мәүлихан ҡыҙы бер нисә йыл Владивостокта эшләй, унда плитка һалыусы-йөҙләүсе була. Һуңынан яҙмыш уны Камчаткаға алып китә, унда штукатурлаусы булып урынлаша. Был һөнәр күп физик көс талап итә, шуға күрә һатыусы булыу мөмкинлеге тыуғас, ҙур теләк менән эш урынын үҙгәртә. Ул йыш ҡына коллегаһын алмаштыра, күп эшләй. Яуаплы, тырыш ҡатынды етәкселек күрә һәм кондитер цехына күсерәләр, ә һуңыраҡ директор урынбаҫары итеп тәғәйенләйҙәр. Йәш, маҡсатҡа ынтылышлы Гөлназ Мәүлихан ҡыҙы ялһыҙ эшләй. Ул ныҡышмалылығы, профессионализмы менән айырылып тора, шуның менән етәкселәр һәм коллегалары араһында хөрмәт яулай.
Бер аҙҙан өлкәнәйгән ата-әсәһен ҡарау өсөн тыуған иленә ҡайтырға ҡарар итә. Бында ул мәктәптә йыйыштырыусы булып эшкә урынлаша, ә кистәрен район Мәҙәниәт һарайында аэробика түңәрәген алып бара. Тыуған ерендә яңынан ғаилә ҡора.
Берҙән-бер улы Дмитрийҙы әсә үҙ иленең лайыҡлы гражданы итеп тәрбиәләй. Дмитрий Алексеевич контракт буйынса Украинала махсус хәрби операцияла ҡатнаша. Ул үлгәндән һуң Батырлыҡ һәм Шайморатов ордендары менән наградлана. Дмитрийҙың батырлығы, Ватанға тоғролоғо яҡташтары өсөн өлгө булып тора.
Гөлназ Мәүлихан ҡыҙы менән аралашып, был гүзәл заттың бик көслө рухлы булыуына хайран ҡалаһың. Яҙмыш тарафынан әҙерләнгән бөтә һынауҙарҙы күтәреп, ул тормош юлынан ныҡлы аҙымдар менән атлай.
Хәҙер ҙә Гөлназ Мәүлихан ҡыҙы элеккесә әүҙем тормош алып бара. “Зөбәржәт” татар халыҡ фольклор ансамблендә шөғөлләнә, уның составында район һәм республика сараларында сығыш яһай.
Ләйсән АБЗАНОВА.