Атҡан да ҡасҡан

Матур байрамдың йәмен ебәреүселәр табылып тора. Ишембай хоҡуҡ һаҡсылары тәртип боҙған 26 йәшлек егетте тотҡан - ул ҡала үҙәгендәге күңел асыу комплексы янында атыу ойошторған. Ваҡиға төнгө сәғәт икеләрҙә теркәлгән.

Аҙаҡ асыҡланыуынса, кафелағы ҡунаҡтарҙың береһе ҡатын-ҡыҙ менән талашып, залда шау-шыу тыуҙырған. Икенсе бер егет уға йәмһеҙ ҡылығы өсөн шелтә яһағас, көслө зат үҙ-ара талашып киткән. Шунан һуң егеттәр мөнәсәбәт асыҡларға урамға сыҡҡас, иҫкәрмә яһаған ир оппонентына пневматик пистолеттан атҡыслаған да ҡасҡан.

Башҡортостан буйынса Эске эштәр министрлығы матбуғат хеҙмәте мәғлүмәтенсә, бит-йөҙө, ҡул-аяғы яралы 27 йәшлек ирҙе дауаханаға оҙатҡандар. Ә атыш ойошторған 26 йәшлекте полицейскийҙар "эҫе" мәлендә эләктергән. Хәл-ваҡиға буйынса тикшереү бара.

Фото: Ufa-bezformata.com

Автор: Аклима Гизатуллина

https://bash.rbsmi.ru/articles/kh-ef-e-lek/At-an-da-as-an-707018/