Башҡортостанда йәшәүселәр 1 декабргә тиклем 5,5 миллиард һум һалым түләргә тейеш

«Башинформ» хәбәр иткәнсә, республикала физик берәмектәрҙең иҫәпләп сығарылған милек һалымының һәм НДФЛ-дың дөйөм суммаһы 5,5 миллиард һумдан ашыуыраҡ. Шуның 1,78 миллиард һумы өфөләргә тура килә.

Һүҙ, атап әйткәндә, милек, транспорт һәм ер һалымын түләү хаҡында бара.

Һалымды һалым түләүсенең Шәхси кабинетында, «Физик берәмектәрҙең һалымы» мобиль ҡушымтаһында, «Һалым һәм пошлина түләү» сервисы ярҙамында йәки Берҙәм дәүләт хеҙмәттәре порталы аша йә иһә терминалдарҙа, банк һәм почта бүлексәләрендә түләргә мөмкин.