Башҡортостанда һәүәҫкәр һунарҙы махсус хужалыҡтарға күсерергә йыйыналар

Тиҙҙән Башҡортостан парламенты депутаттары һунар һәм йәнлектәр донъяһы тураһында республика закондарына үҙгәрештәр ҡабул итергә йыйына.

Республика ҡануниәтендәге яңылыҡтар ярым иреклешарттарҙа һәм яһалма булдырылған йәшәү мөхитендә тотолған йәнлектәргә ҡарата һәүәҫкәр һәм спорт һунарын көйләү менән бәйле.

Закон проекты һунарсылыҡ хужалыҡтарында ҡырағай йәнлектәрҙе үрсетеүҙе, һунар алып барылған махсус биләмәләрҙә уларҙың һанын тергеҙеүҙе күҙ уңында тота.

«Был тәбиғи йәшәү мөхитендәге йәнлектәр һанында ыңғай сағылыш табырға тейеш, — тип белдерҙе Башҡортостан парламенты спикеры Константин Толкачев. — Бынан тыш, бындай ҡараш халыҡ араһында һунарҙың осраҡлы шаһиттарына һәм бәхетһеҙ осраҡтар мөмкинлегенә юл ҡуймай».

Дәүләт Йыйылышында билдәләүҙәренсә, йәшәйештән һунарсылыҡ кеүек хужалыҡ тармағын тулыһынса алып ташлап булмай. Шуға күрә уны кешелеклерәк, хәүефһеҙерәк итергә, ҡырағай хайуандар популяцияһына уның кире йоғонтоһон кәметергә кәрәк.

Үҫешкән илдәрҙә ошондай һунар итеү системаһы күптән уңышлы файҙаланыла. Улар араһында – Германия, Швейцария, Италия, Бөйөк Британия.

«Беҙҙә был тәжрибә яңыраҡ ҡына популярлыҡ яулай башланы. Йәнлектәр үрсетеү менән шөғөлләнгән һунарсылыҡ хужалыҡтары брлыҡҡа килә, ләкин хоҡуҡи яҡтан билдәһеҙлек уларҙың эшенә ҡамасаулай, республикабыҙҙа ҡабул итеүгә тәҡдим ителгән закон проекты уны бөтөрөүгә йүнәлтелгән», — тип өҫтәне Толкачев.

«Башинформ» хәбәр иткәнсә, 1 сентябрҙән Башҡортостанда һунар итеүҙең яңғы ҡағиҙәләре ғәмәлгә инде. Республика башлығы Радий Хәбиров тейешле бойороҡҡа ҡул ҡуйҙы.

Фото: Сергей Николаев

Галина Бахшиева

Теги: закон, һунар

https://www.bashinform.ru/bash/1492852/