Мәсетле тормошо
+9 °С
Болотло
Бөтә яңылыҡтар
Новости
27 Август 2020, 11:10

Бар проекттар ҙа ярҙам аласаҡ

Башҡортостан Башлығы Радий Хәбиров сираттағы тапҡыр онлайн рәүештә “Инвестиция сәғәте” кәңәшмәһен үткәрҙе. Унда юл буйы сервисы һәм ауыл хужалығы өлкәләрендәге яңы проекттар ҡаралды.

Эшҡыуар Илдар Әминев “Добрый день+” заманса сауҙа-ҡунаҡхана комплексы проектын тәҡдим итте. Ул М7 трассаһы буйлап Кушнаренко районында урынлашасаҡ. Инвестор төҙөлөшкә 105 миллион һум аҡса һалырға һәм 30 яңы хеҙмәт урыны булдырырға йыйына. Эштәрҙе башлау өсөн һайланған ер участкаһын бүлеү һәм теркәүҙә ярҙам кәрәк.
Радий Хәбиров Кушнаренко районы етәкселегенә бөтә кәрәкле процедураларҙы үткәрергә ҡушты. Бынан тыш, проект һалым ташламалары, инженер һәм транспорт инфраструктураһын булдырыу сығымдарының бер өлөшөн ҡаплатыу мөмкинлеге аласаҡ.
Юл буйы сервисы өлкәһендәге тағы бер проектты “ПИК” компанияһы тормошҡа ашарырға йыйына. Улар UFAOIL автозаправкалау селтәрен үҫтермәксе. Генераль директоры Кирилл Горбунов белдереүенсә, үҙ эсенә ике АЗС, автосервис пункты, магазин һәм ҙур булмаған мотелде алған яңы ике комплекс Өфө районында М5 һәм М7 трассаларында урынлашасаҡ. Инвестицияларҙың дөйөм күләме – 220 миллион һум.
Өфө районы хакимиәте башлығы Вилорий Угаров белдереүенсә, инвесторға улар һайлаған ер участкаларын бүлеү өсөн, был ерҙәрҙең алдағы ҡуртымсылары бурыстарын ҡапларға тейеш.
Радий Хәбиров муниципалитетҡа ике аҙна эсендә был мәсьәләне хәл итергә ҡушты.
“Ярославский” ауыл хужалығы кооперативы рәйесе Владимир Храмцев Дыуан районындағы кооператив нигеҙендә иген һәм башҡа культуралар орлоғон етештереү һәм комплекслы эшләп бөтөрөү эшмәкәрлеген ойошторорға йыйына. Төҙөүселәр майҙанда иген таҙартыу комплексын төҙөгән һәм иген киптереү комплексына капиталь ремонт эшләү өсөн ҡорамалды әҙерләп ҡуйған. Шулай уҡ инвестор бер ни тиклем ауыл хужалығы техникаһы, ҡорамалдар һатып алған. Проекттың дөйөм хаҡы 147 миллион һум тип иҫәпләнә.
Вице-премьер – ауыл хужалығы министры Илшат Фәзрахманов аңлатыуына, яңы етештереү сифатлы орлоҡ менән республиканың төньяҡ-көнсығыш райондарын тәьмин итәсәк. Әлегә тиклем был райондарҙа элиталы торлаҡтар кимәле 7-8 проценттан артмаған.
Ярҙам сифатында кооперативтың Ауыл хужалығы министрлығы линияһы буйынса орлоҡтар һатып алыу сығымдарының бер өлөшө ҡапланасаҡ.
– Ошоноң кеүек проекттарға ярҙам итеү өсөн беҙ бөтә мөмкинлекте файҙаланасаҡбыҙ, - тине Радий Хәбиров. – Иҡтисадтағы хәл ҡатмарлы, тик беҙ үҙебеҙҙең бурыстарҙы үтәйәсәкбеҙ һәм был йәһәттән инвесторға ярҙам итәсәкбеҙ.
Фото: Башҡортостан Башлығы сайты.
Автор: Альфия Мингалиева