Радий Хәбиров инфекция таралыуға ҡаршы көрәш буйынса ултырышта ҡатнашты

Радий Хәбиров яңы коронавирус инфекцияһы таралыуға ҡаршы көрәш буйынса Рәсәй Хөкүмәте ҡарамағындағы Координация советы президиумы ултырышында ҡатнашты. Ул видеоконференция режимында уҙҙы. Ултырышты Рәсәй Хөкүмәте рәйесе Михаил Мишустин алып барҙы.

Ул төбәктәрҙең коронавирусҡа ҡаршы көрәшкә әҙерлеген баһаланы. «Президент тейешле күрһәтмә бирҙе, Хөкүмәт уны үтәү срогын билдәләне – 28 апрель. Күрһәтмәне үтәүгә бер аҙнанан кәмерәк ваҡыт ҡалды. Бөгөнгө һөҙөмтәләрҙе ҡәнәғәтләнерлек тип әйтеп булмайҙыр, - тине Премьер-министр.

Михаил Мишустин билдәләүенсә, күрһәтмәгә ярашлы, һәр төбәктә коронавирустан яфаланған пациенттар менән эшләрлек табиптар бригадалары төҙөлөргә тейеш. Ул шулай уҡ төбәк башлыҡтарына табиптарҙың һәм урта медицина персоналының етеү-етмәүен шәхсән тикшерергә ҡушты.

Рәмзиә Кәримова.

https://bash.news/bash/news/122048-radiy-khebirov-infektsiya-taralyuga-karshy-keresh-buyynsa-ultyryshta-katnashty