Ветерандарҙың һаулығы тикшерелә

Республика табиптары һуғыш ветерандарын комплекслы тикшереү өсөн ауыл һәм ҡалаларға сыға.

Йөрөй алмаған һәм төпкөлдә йәшәгән элекке яугирҙарға табиптар бригадаһы үҙе килә. Был составта хирург, окулист, ортопед, невролог, уролог, кардиолог бар.

Ветерандарға хеҙмәт күрһәтеү айлығында 4806 күсмә бригада эшләгән. Медицина белгестәре Бөйөк Ватан һуғышында ҡатнашыусыларға, инвалидтарына, тыл ветерандарына, яугирҙарҙың тол ҡатындарына, блокадалы Ленинградта йәшәүселәргә, концлагерҙар тотҡондары булыусыларға барған.

Беләһегеҙ, әле илдә "Һаулыҡ һаҡлау", "Демография" милли проекттары (12 милли проект араһында) ғәмәлгә ашырыла. Һуғыш ветерандарына күрһәтелгән иғтибар һәм ярҙам да ошо проекттарҙың маҡсаттарына өлгәшеүгә булышлыҡ итер тигән өмөт бар.

Фото: "Башинформ".