Ғаиләбеҙ маяғы

Һинең 75 йәшлек юбилей – тәрән аҡыл, изгелек, хәстәрлек һәм сикһеҙ һөйөү менән тулы иҫ киткес тормош билдәһе, уны һин бөтә ғаиләбеҙгә мул итеп өләшәһең. Һин – беҙҙең маяҡ, беҙҙең илһам сығанағы, иң яҡын кешебеҙ. Һинең сабырлығың, наҙың, кәңәштәрең – быларҙың барыһы ла беҙҙең өсөн бик ҡәҙерле.
Ә атайыбыҙ менән бергә 50 йыл ғүмер итеүегеҙ – ысын, ныҡлы, эскерһеҙ һөйөү өлгөһө. Һеҙҙең бер-берегеҙгә ярҙам итеүегеҙҙе, күп йылдар дауамында хистәрегеҙҙең һүнмәүен күреү – беҙҙең өсөн иң ҙур бәхет. Һеҙ – ғаилә ҡиммәттәре эталоны, ысын мөхәббәттең төрлө һынауҙар аша үтеп сығып, көслөрәк һәм нығыраҡ була алыуын дәлилләйһегеҙ.
Әсәй, атай, беҙ һеҙгә барыһы өсөн дә сикһеҙ рәхмәтлебеҙ – тормош, тәрбиә, көндәлек өлгө, һөйөүегеҙ, һәр саҡ йылы һәм йәмле йортобоҙ өсөн.
Ошо икеләтә байрамда һеҙгә ныҡлы һаулыҡ, бөтмәҫ дәрт, оҙаҡ йылдар бергә бәхетле ғүмер итеүегеҙҙе теләйбеҙ. Һәр көнөгөҙ ҡояш, йылмайыу, шатлыҡ һәм һөйөү менән тулы булһын. Ейәнсәрҙәрегеҙ һеҙҙе шатландырһын, ә һеҙ беҙҙе аҡылығыҙ һәм изге йөрәгегеҙ менән ҡыуандырығыҙ.
Беҙ һеҙҙең менән бик ғорурланабыҙ. Һеҙҙең һөйөү – ул беҙҙең төп терәгебеҙ һәм баһалап бөткөһөҙ мираҫыбыҙ!
Һөйөү һәм тәрән ихтирам менән Губкинский ҡалаһынан улығыҙ Роберт, киленегеҙ Ирина, ейәнсәрҙәрегеҙ Алина һәм Диана.

* * *

Салйоғот ауылында йәшәүсе ҡәҙерле әсәйебеҙ ӘМИНӘ ХӘКИМУЛЛА ҡыҙы ӘХМӘҘУЛЛИНАны күркәм юбилейы – 75 йәше тулыу менән ҡотлайбыҙ.
Һинең тормошоң – ныҡлыҡ, изгелек һәм ғәйәт ҙур рух көсө өлгөһө. Һин һәр саҡ ярҙам итәһең, йыуатырға, көслө рухлы булырға өйрәтә белдең. Һинең хәстәрлекле ҡулдарың, наҙлы йылмайыуың, аҡыллы кәңәштәрең – быларҙың барыһы ла беҙҙең өсөн бик ҡәҙерле. Беҙ һиңә барыһы өсөн дә рәхмәтлебеҙ. Һиңә мөхәббәт, йылмайыу, яҡындарыңдың шат тауыштары менән тулы оҙон ғүмер теләйбеҙ.
Бөгөн һинең моңдан торған көнөң,
Күркәмдәрҙән-күркәм бер мәлең.
Аҡ яҙмышың һиңә бүләк итһен
Был донъяның барлыҡ саф йәмен.
Ҡотло булһын матур юбилейың,
Юлдарыңа ынйы һибелһен.
Тормошоңдоң алһыу таңы
Бөтмәҫ бәхет кенә килтерһен!
Иң изге теләктәр менән Ҡазан ҡалаһынан улың Альберт, киленең Татьяна.
* * *
Салйоғот ауылында йәшәүсе ҡәҙерле туғаныбыҙ ӘМИНӘ ХӘКИМУЛЛА ҡыҙы ӘХМӘҘУЛЛИНАны 75 йәшлек күркәм юбилейы менән ихлас ҡотлайбыҙ.
Һине бөгөн матур ғүмер байрамың менән тәбрик итеп, ныҡлы һаулыҡ, һәр көнөң ҡояшлы, һөйөү, иғтибар, яҡындарыңдың хәстәрлеге, матур мәлдәр һәм күңелле хистәр менән тулы булыуын теләйбеҙ. Алдағы ғүмерең ҡыуаныстар менән тулып килһен, имен һәм оҙон булһын. Һөйкөмлө йылмайыуың менән беҙҙе артабан да һөйөндөрөп тор. Беҙ һине хөрмәт итәбеҙ һәм яратабыҙ!
Ҡотлау менән Оло Ыҡтамаҡ ауылынан Мөхөбуллиндар, Өфө ҡалаһынан Байғужиндар, Малаяҙ ауылынан Хәйеровтар, Миндиәровтар, Ҡырғыҙ-Миәкәнән Нәбиуллиндар.