Тәжрибәле аграрий юбилейын билдәләй

Павел Леонидович 1960 йылдың 30 мартында Мәсетле районының Кесе Ыҡтамаҡ ауылында тыуған. 1982 йылда Свердловск ауыл хужалығы институтын тамамлағандан һуң хеҙмәт юлын В. И. Ленин исемендәге колхозда башлай (хәҙер – “Ленинский” кооперативы): МТМ мөдире, баш инженер булып эшләй.
2000 йылдың февралендә коллективтың дөйөм йыйылышында Павел Леонидович “Ленинский” кооперативы рәйесе итеп һайлана. Һәм бына инде 25 йылдан ашыу ул ошо хужалыҡ менән етәкселек итә. Бөгөнгө көндә “Ленинский” кооперативы Мәсетле районының ғына түгел, ә республиканың бөтә Төньяҡ-Көнсығышының ҙур һәм тотороҡло үҫешкән хужалыҡтарының береһе булып тора.
Павел Леонидович 40 йылдан ашыу ғүмерен ауыл хужалығына бағышланы. Ошо йылдар дауамында уның хеҙмәт эшмәкәрлегенең төп маҡсаты – туған хужалығын үҫтереү һәм хеҙмәтсәндәрҙең тормош кимәлен күтәреү. Ул етештереү һөҙөмтәлелеген, хеҙмәт етештереүсәнлеген, сығарылған продукцияның сифатын һәм башҡа күп күрһәткестәрҙе арттырыу өҫтөндә арымай-талмай эшләй. Ауыл хужалығы предприятиеһы уңышының яртыһы уның дөрөҫ эш итеүенә бәйле. Уның эшмәкәрлеге осоронда хужалыҡта ҙур үҙгәрештәр булды: трактор һәм автомобиль паркы яңыртылды, байтаҡ ауыл хужалығы техникаһы һатып алынды, шул уҡ ваҡытта йыл һайын автопарк яңы агрегаттар менән тулылана. Һөтсөлөк-тауар фермаһы яңыртылды, һауыу ҡорамалдары тулыһынса алмаштырылды.
Павел Ватолин етәкселегендәге берҙәм коллектив йыл һайын яҙғы баҫыу һәм урып-йыйыу эштәре ваҡытында максималь көс һала, был етештереү күрһәткестәренең артыуына килтерә.
“Ленинский” кооперативы – 40 йылдан ашыу сусҡа ите етештереү менән шөғөлләнгән республиканың Төньяҡ-Көнсығышындағы берҙән-бер предприятие. Бынан тыш хужалыҡ ярымфабрикаттар етештерә, үҙ цехы һәм икмәкхана эшләй. “Ленинский” АПК-һы продукцияһы өҫтәмәләр, төрлө ҡушылмалар һәм тәм көсәйткестәр ҡулланмайынса, тик тәбиғи сеймалдан ғына етештерелә һәм ярашлылыҡ сертификаттарына эйә.
Павел Леонидович инициативаһы буйынса 2013 йылдан алып кооператив Екатеринбург ҡалаһының Урал ауыл хужалығы ғилми-тикшеренеү институты ғалимдары менән хеҙмәттәшлек итә. Йыл һайын районлаштырылған ауыл хужалығы культураларының тәжрибә сорт участкалары сәселә.
Ауыл хужалығында күп йыллыҡ эш тәжрибәһе булыуға ҡарамаҫтан, Павел Леонидович республиканың алдынғы ауыл хужалығы предприятиелары практикаһын даими өйрәнә. Хужалыҡ етәксеһе өлгәшелгәндәр менән туҡтарға йыйынмай. Уның артабан да хужалыҡты уңышлы үҫтерергә ярҙам итәсәк күп яңы пландары, идеялары һәм проекттары бар.
Павел Леонидович изге күңелле һәм ярҙамсыл кеше. Уның исемен Мәсетле районы халҡы яҡшы белә. Ул райондаштарының йәмәғәт тормошонда әүҙем ҡатнаша. Оҙаҡ йылдар район Советы депутаты булып тора, һайлаусыларҙың биргән наказдарын намыҫ менән үтәй. Муниципаль район Советының аграр мәсьәләләр, ерҙәрҙе һәм тәбиғәт ресурстарын файҙаланыу, экология һәм ғәҙәттән тыш хәлдәр, сәнәғәт, торлаҡ-коммуналь хужалыҡ, транспорт, сауҙа, эшҡыуарлыҡ һәм халыҡҡа башҡа хеҙмәттәр күрһәтеү буйынса даими комиссияһы рәйесе булып тора.
Оҙаҡ йылдар намыҫлы, уңышлы хеҙмәте өсөн ул бер нисә тапҡыр хужалыҡтың, муниципаль район хакимиәтенең, Башҡортостан Республикаһы Ауыл хужалығы министрлығының почет грамоталары менән билдәләнде, 2019 йылда Мәсетле районында продукция етештереү буйынса хужалыҡтың иң яҡшы етәксеһе тип танылды. “Башҡортостан Республикаһының атҡаҙанған ауыл хужалығы хеҙмәткәре” һәм “Рәсәй Федерацияһының атҡаҙанған ауыл хужалығы хеҙмәткәре” исемдәренә лайыҡ. Ул – Мәсетле районының почетлы гражданы, Салауат Юлаев ордены кавалеры.
Ҡатыны Галина Николаевна менән өс бала тәрбиәләп үҫтерәләр. Ватолиндар ғаиләһе бәхетле – улар биш ейән-ейәнсәргә яратҡан олатай һәм өләсәй.

Хөрмәтле Павел Леонидович!
Һеҙҙе ысын күңелдән юбилейығыҙ менән ҡотлайбыҙ!
Оҙаҡ йылдарға етәрлек ныҡлы сәләмәтлек, рух ныҡлығы теләйбеҙ. Һөнәри эшмәкәрлегегеҙҙә уңыштар юлдаш булһын. Күп йылдар дауамында Һеҙҙең маҡсатлы ҡарашығыҙ һәм энергияғыҙ райондың аграр секторын үҫтереүгә булышлыҡ итһен. Йылдар үткән һайын туғандарығыҙҙы, ышаныслы коллегаларығыҙҙы һәм тоғро дуҫтарығыҙҙы туҡландырған йәшәү көсө нығынһын!
Мәсетле районы Советы һәм хакимиәте, Мәсетле мәғлүмәт-консультация үҙәге коллективтары.