Һәр нәмәлә һәләтле педагог

Ул – һәр баланың һәләтен асыҡлай һәм үҫтерә белгән, изге тылсымсы һымаҡ серле музыка донъяһы ишеген сағыу буяуҙар менән асҡан үҙенсәлекле оҫта. Бөтә өлкәндәр ҙә музыка донъяһы менән яҡындан аралаша алмай, ә Альбина Әшрәф ҡыҙының музыкаль ҡунаҡханаһы хатта иң бәләкәй тәрбиәләнеүселәргә лә сәнғәт донъяһына инергә мөмкинлек бирә. Сухомлинский былай тип яҙған: “Музыка изгелеккә, матурлыҡҡа, кешелеклелеккә йәлеп итеүҙең иң мөғжизәле, иң нескә сараһы булып тора... Музыкаль көйҙөң матурлыҡ тойғоһо бала алдында үҙенең матурлығын аса – бәләкәй кеше үҙенең дәрәжәһен аңлай. Музыкаль тәрбиә – ул музыкант тәрбиәләү түгел, ә иң тәүҙә кешене тәрбиәләү”.
Альбина Әшрәф ҡыҙына халыҡ ижады, мәҙәни мираҫҡа ҡиммәтле мөнәсәбәт темаһы, халыҡтың этномәҙәни һәм гражданлыҡ оҡшашлығы бик яҡын. Ул балаларҙы фольклорҙың бөтмәҫ байлыҡтары менән таныштыра, сөнки Ватанды аңлау, уға һөйөү тап ошонан башлана, балаларҙа илһөйәрлек тойғоһо формалаша. Шуға ла балалар баҡсаһында тәрбиәләнеүселәр халыҡ бейеүҙәрен һәм йырҙарын башҡара, Рәсәйҙә йәшәгән төрлө халыҡтарҙың мәҙәни мираҫы менән таныша.
Альбина Әшрәф ҡыҙы – мәктәпкәсә белем биреүҙә этномәҙәни йөкмәткеле медиаконтент конкурсы призеры (2020), “Таныу һәм ихтирам” номинацияһында “Халыҡ таныуы” район конкурсы еңеүсеһе, “Һөнәре буйынса иң яҡшыһы-2015” конкурсы еңеүсеһе. Ул – “Төҫ һәм шат тауыштар – һаулыҡ һәм уңыш нигеҙе!”, “Сәскә ат, Мәсетле ере!”, “Беҙҙең театр”, “Тормош юлы буйлап”, “Бергә” проекттары авторы. Методик уйындар, “Беҙҙе байрамға саҡырҙылар”, “Өс тау”, “Уйын башлаусы Ҡурсаҡ”, “Бер таҫманың тарихы” әкиәттәре, “Тирмәкәй” экологик әкиәте авторы.
Музыкаль етәксенең профессиональ характерының мөһим һыҙаттары – изгелек, яуаплылыҡ, оптимизм, сабырлыҡ, дәрт, үҙ эшең менән мауығыу, тәрбиәләнеүселәргә ихтирам һәм һөйөү, профессиональ намыҫлылыҡ һәм әҙәплелек. Уны хеҙмәттәштәре бик ярата һәм хөрмәт итә. Музыка етәксеһе ғүмере буйына һөнәри тәжрибәһен камиллаштыра, алған белемен коллегалары, фекерҙәштәре, ата-әсәләр менән йомарт өләшә. Һәләтле кеше һәр нәмәлә һәләтле. Альбина Әшрәф ҡыҙы – балалар һәм өлкәндәр репертуары өсөн йырҙар авторы һәм композиторы; “Күңелеңдә ҡояш”, “Сәскә ат, Мәсетле ере!”, “Тормош юлы буйлап” хәйриә концерттары авторы һәм етәксеһе; “Миләш” балалар баҡсаһы хеҙмәткәрҙәренең вокаль ансамбле етәксеһе (“Минең Ватаным” халыҡ-ара конкурсы еңеүселәре, “Таланттарҙың күп төҫө” республика конкурсының II дәрәжә лауреаттары); “Миләш” балалар баҡсаһы тәрбиәләнеүселәренең йыр-бейеү студияһы, “Күңелле балалар”, “Бәхет” (лицей, Пионерҙар һәм уҡыусылар йорто) һәм “Бергә” (Башҡорт гимназияһы) хореография берләшмәләре етәксеһе. Уларҙа тәрбиәләнеүселәр – бейеү конкурстарында даими ҡатнашыусылар һәм еңеүселәр (Өфө һәм Екатеринбургта үткән конкурстарҙа I, II дәрәжә лауреаттар).
Музыка етәксеһенең эшендә позитив бармы? Әлбиттә, күпме теләйһең – шул саҡлы! Был балалар менән даими аралашыу, уларҙың көн һайын донъяны үҙенсә ҡабул итеүе менән хайран ҡалдырыуы. Был – һөҙөмтәгә өлгәшеү шатлығы; мәңгелек йәшлек – музыкаль етәксегә йәшкә ҡарап иҫәпләшергә ваҡыт юҡ; даими үҫеш – кем туҡтай, шул артта ҡала; ижад өсөн варианттарҙың күп төрлөлөгө – дәрестәр өсөн конспекттар яҙыуҙан алып ғилми эштәр һәм проекттар. Был профессияла һәр ваҡыт шатлыҡлы аралашыу, бер ҡасан да яңғыҙ ҡалмау, һағышланырға ваҡыттың булмауы хас.
– Балаларҙың музыкаль дәрестәргә һәр саҡ ҙур теләк менән йөрөүе минең эшемдең төп күрһәткесе булып тора, – тип һөйләй Альбина Әшрәф ҡыҙы. – Был бик ҡыуандыра. Мин тәрбиәләнеүселәремде яратам. Уларҙың һоҡланыулы күҙҙәрен, көлөүҙәрен, алсаҡ йылмайыуҙарын, эскерһеҙ ҡыҙыҡһыныуҙарын яратам. Берлектәге һәр шөғөл – ул байрам, ниндәйҙер яңылыҡ асыу. Мин балаларҙың баҡсаға йөрөүен музыка, әкиәт, сағыу тәьҫораттар, изгелек һәм үҙ-ара аңлашыу менән тулыландырырға теләйем, һәм миңә бындай мөмкинлекте эшем бирә...
Мәктәпкәсә йәштәге балаларҙы тәрбиәләүҙәге ҙур уңыштары, хәҙерге мәҙәниәт һәм сәнғәт ҡаҙаныштары күҙлегенән сығып тәрбиә биреү процесын камиллаштырған, балаларҙың әхлаҡи нигеҙҙәрен формалаштырыуға ҙур өлөш индергәне өсөн Альбина Әшрәф ҡыҙы Башҡортостан Республикаһы Мәғариф министрлығының Почет грамотаһы, Рәсәй Федерацияһы Мәғариф һәм фән министрлығының Почет грамотаһы менән бүләкләнде.

Хөрмәтле коллегабыҙ – “Миләш” балалар баҡсаһының музыка етәксеһе АЛЬБИНА ӘШРӘФ ҡыҙы ЗАКИРОВАны юбилейы менән ихлас ҡотлайбыҙ.
Һеҙ ғүмерегеҙҙе мәктәпкәсә йәштәге балаларҙы тәрбиәләүгә бағышланығыҙ. Наҙлы һүҙҙәрегеҙ менән балаларға күңел йылыһын өләшәһегеҙ. Һеҙҙең профессионализм, белемегеҙ һәм эшкә яуаплы ҡарашығыҙ балалар баҡсаһы тәрбиәләнеүселәрендә, коллегаларығыҙҙа һәм ата-әсәләрҙә ихтирам уята. Һеҙ холоҡ ныҡлығы һәм балаларға наҙлы хәстәрлек, талапсанлыҡ, изгелек, аҡыл, юмор тойғоһо менән һуғарылған һоҡланғыс кеше. Һеҙгә ныҡлы һаулыҡ, уңыштар, бәхет, изгелек, тыныслыҡ һәм именлек теләйбеҙ!
Оло Ыҡтамаҡ ауылының “Миләш” балалар баҡсаһы коллективы.