Мәсетле тормошо
+11 °С
Болотло
Бөтә яңылыҡтар
Юбилейҙар
24 Февраль 2021, 11:20

Нисек итеп мин типография өсөн ҡағыҙ алырға барҙым

Район гәзитенең юбилейына бәйле гәзит уҡыусыларыбыҙҙың хәтирәләрен баҫтырыуҙы дауам итәбеҙ. Был юлы Миндихан Әминевтың хәтирәләре менән таныштырабыҙ:

“Булмышым менән водитель булһам да, гәзит сығарыу эшенә мин дә бер аҙ өлөш индерҙем.
Мәҡсүт ағай Бикембәтов директор булып эшләгәндә, типографияла гәзит баҫтырыр өсөн ҡағыҙҙы Өфөнән алып ҡайта инек. Мин ул ваҡытта “Сельхозтехника” ойошмаһында водитель булып эшләйем. Мәҡсүт Шәйәхмәт улы автомобиль һорап килде. Өфөгә мине ебәрергә булдылар. Шулай итеп беҙ Мәҡсүт ағай менән танышып һәм дуҫлашып киттек. Өфөгә барырға тура килһә, юлды яҡшы белгәнлектән, мине ала торғайны. Өфөлә беҙ һәр ваҡыт “Колос” ҡунаҡханаһында туҡталдыҡ. Унда урындар ҡалмаған осраҡта ла беҙгә һәр ваҡыт бүлмә таптылар һәм ҡунаҡ һымаҡ ҡәҙерләп ҡаршыланылар. Сере нимәлә, тиһегеҙме? Ҡунаҡхана өсөн квитанция бланкылары беҙҙең район типографияһында баҫыла ине.
Мәҡсүт Шәйәхмәт улы бик тырыш кеше булды. Уның менән ҡайҙа ғына барһаҡ та, буш ҡайтҡаныбыҙ булманы. Ә ул ваҡытта гәзит ҡағыҙы табыу еңел түгел ине. Ҡағыҙ эҙләп Силәбе һәм Свердловск өлкәләрендә лә йөрөнөк, барыбер табып алып ҡайта торғайныҡ.
Мәҡсүт ағай пенсия йәшенә етә башлағас: “Әйҙә, Миндихан, минең урынға кил, мин һине өйрәтермен”, – тип типографияға эшкә саҡырҙы. Мәҡсүт ағайҙы бик ныҡ хөрмәт итһәм дә, үҙ эшемде яратҡанлыҡтан, баш тартырға тура килде”.
Хөрмәтле гәзит уҡыусылар!
2021 йыл “Мәсетле тормошо” район гәзите өсөн иҫтәлекле йыл – 10 мартта баҫманың тәүге һаны донъя күреүгә 90 йыл тула. Шуға бәйле бер юлы бер нисә ҡыҙыҡлы конкурс иғлан иттек. Беҙгә яҙығыҙ, хәтирәләрегеҙ менән уртаҡлашығыҙ.
“Архив биттәре” конкурсы
Күптәрегеҙҙең өйөндә 20-30 йыл элек нәшер ителгән һәм унан да алдараҡ сыҡҡан район гәзиттәре һаҡланалыр, моғайын. Уларҙы ни өсөн һаҡлауығыҙ тураһында беҙгә лә һөйләгеҙ, гәзитте редакцияға алып килегеҙ. Район гәзитенең иң элекке һәм ҡыҙыҡлы һаны хужаларын бүләктәр көтә.
“Юбилейҙы йырҙар һәм шиғырҙар менән ҡаршы алабыҙ” конкурсы
Йырһыҙ һәм шиғырҙарһыҙ юбилей буламы инде? Мәсетлеләрҙе әҙәби-музыкаль конкурста ҡатнашырға саҡырабыҙ. “Мәсетле тормошо” гәзитенә арналған шиғырҙарығыҙҙы, таҡмаҡтарығыҙҙы һәм йырҙарығыҙҙы ҙур түҙемһеҙлек менән көтөп ҡалабыҙ. Улар барыһы ла гәзиттә донъя күрәсәк. Иң ҡыҙыҡлы шиғри юлдар авторҙарын күңелле сюрприз көтә.
“Мин һәм минең яратҡан гәзитем” фотоконкурсы
Район гәзите менән үҙенсәлекле фотоһүрәттәрегеҙҙе беҙгә ебәрегеҙ. Фоторәсемдәр редакцияның рәсми төркөмдәрендә баҫылып сығасаҡ. Иң күп “лайк” билдәһе йыйған һүрәт авторына махсус приз тапшырасаҡбыҙ.
Конкурсҡа материалдарҙы Оло Ыҡтамаҡ ауылы, Мәктәп урамы, 23 адресы буйынса редакцияға алып килергә кәрәк. Шулай уҡ “На конкурс к юбилею” билдәһе менән [email protected] электрон почтаһына ебәрергә мөмкин.
Белешмәләр өсөн телефон: 8 (34770) 2-00-34.
Хөрмәтле гәзит уҡыусылар! Беҙ шулай уҡ район гәзите һәм редакция хеҙмәткәрҙәре менән бәйле йылы иҫтәлектәрегеҙҙе ихлас ҡабул итәбеҙ.