Башҡортостанда Халыҡ-ара “Геосаҡырыу” геологик чемпионаты башланды

Икенсе Халыҡ-ара геологик чемпионат Өфөлә 2 сентябрҙән 9-ына тиклем Шишмә һәм Ғафури райондарында үтә.

Чемпионатҡа илдең 15 төбәгенән, шулай уҡ унлаған илдән – Ҡытай, ЮАР, Мозамбик, Зимбабве, Эфиопия, Гвинея, Гана, Грузия, Үзбәкстан, Ҡаҙағстандан геологик йүнәлештәге студенттар йыйылды. Һәр командала - кураторҙары менән бергә етешәр кеше. Алты көн буйы улар 11 төп этап буйынса ярышасаҡ.

Чемпионат Башҡортостан Башлығы Радий Хәбиров һәм Ер аҫты байлыҡтарын файҙаланыу буйынса федераль агентлыҡ (Роснедра) инициативаһы буйынса уҙғарыла. “Геосаҡырыу”ҙың эксперттары һәм остаздары – “Роснедра”ның һәм ведомстволар, ер аҫты байлыҡтарын файҙаланыусы компаниялар , профилле уҡыу йорттары, Рәсәй Фәндәр академияһының Өфө федераль тикшеренеү үҙәге геологтары.

- Бөгөн тәүге тапҡыр Карьер көнө үткәрелә – ер аҫты байлыҡтарын файҙаланыусылар эшмәкәрлектәре тураһында һөйләйәсәк һәм ғәмәли эшкә студенттарҙы йәлеп итергә тырышасаҡ. Беренсе чемпионатта күптәре тәжрибә туплап, киләсәккә юл алған да инде. Шуға күрә был йүнәлеш яңы белгестәр менән тулыланыр, ә йәштәр эшкә урынлашыу мөмкинлеге алыр, тип ышанам, - тип һөйләне республика Башлығы етәксеһе Максим Забелин.

Карьер көнөнән һуң чемпионатта ҡатнашыусылар “Патриот” паркында Башҡортостан Башлығы Радий Хәбиров менән осрашасаҡ.

Иҫегеҙгә төшөрәбеҙ: беренсе “Геосаҡырыу” геологик чемпионаты Башҡортостанда 2023 йылдың сентябрендә үткәйне. Унда илдең 13 төбәгенән һәм Ҡаҙағстандан 120-нән күберәк студент ҡатнашты.

Жанна Миронова фотоһы.

Автор:Аклима Гизатуллина

Источник: https://bashgazet.ru/articles/belem-m-t-rbi/2024-09-02/bash-ortostanda-haly-ara-geosa-yryu-geologik-chempionaty-bashlandy-3908540