Яңы йылға яҡшы бүләк

22 декабрҙә “Башҡортостан” дәүләт концерт залында Баш-ҡортостан Республикаһы Башлығының Яңы йыл шыршыһы үтте. Байрамға республиканың уҡыу алдынғылары, олимпиадаларҙа һәм спорт ярыштарында еңеүселәр, төрлө фестивалдәр лауреаттары, аҙ тәьмин ителгән ишле ғаиләләрҙән балалар килде.

Беҙҙең район мәктәптәренең иң яҡшы уҡыусылары ла әлеге сарала булды. Быйыл ундай бәхет Богдан Худяковҡа (1-се Оло Ыҡтамаҡ лицейы), Илнур Абдрахмановҡа (Яңы Яуыш мәктәбе), Алина һәм Лиана Әсбаповаларға (Әжекәй мәктәбе) йылмайҙы.

Беҙҙең делегация баш ҡалаға көн элгәре юлланды. Беҙ “Йәшел сауҡалыҡ” шифаханаһында йәшәнек. Кисен мәҙәни-ял итеү сараһы ойошторолдо, шыршыны асыу тантанаһы үтте.

Балаларҙың төп иртәлегендә артистар бала-саға өсөн йәшел ҡупшыҡай тирәләй Ҡыш бабай һәм Ҡарһылыу, әкиәт персонаждары менән традицион әйлән-бәйлән үткәрҙе. Шулай уҡ балаларға “Яңы йыл әкиәте” тамашаһы тәҡдим ителде. Сағыу сценография, заманса хореография, ҡупшы костюмдар, дәртле йырҙар – республиканың төп концерт залында быларҙың барыһы ла булды. Иҫтәлеккә уҡыусылар Эт йылы символына – йомшаҡ уйынсыҡ- тарға, китап һәм татлы бүләктәргә лайыҡ булды.

Был сәфәр егет һәм ҡыҙҙар хәтерендә оҙаҡ һаҡланыр, тип уйлайым.

Ринат Фәттәхов, Пионерҙар һәм уҡыусылар йорто директорының уҡытыу-тәрбиә эштәре буйынса урынбаҫары.