Мәсетле тормошо
+20 °С
Болотло
Бөтә яңылыҡтар

Пионерия йәшәй йөрәктәрҙә

Советтар Союзында йыл һайын 19 апрелдә Пионерия көнөн билдәләйҙәр ине. Был байрам балаларҙың берҙәм коммунистик ойошмаһына бағышланған. Совет заманында пионер булыу бик маҡтаулы булып иҫәпләнде. Советтар Союзының тарҡалыуына байтаҡ йылдар үтһә лә, был көн тураһында хәтерләйҙәр һәм күп кенә балалар ойошмалары уны билдәләй.

Пионерия көнө алдынан район мәҙәниәт һарайында “Йәйғор” балалар йәмәғәт ойошмалары активистары слеты үтте. Унда 10 команда – “Здесь и сейчас с РДШ” район йыллыҡ проекты ҡатнашыусылары килгәйне.

Тышта көн һалҡын, ямғырлы булыуына ҡарамаҫтан, залда йылы һәм ыңғай атмосфера хөкөм һөрҙө.

Байрамда Йәштәр үҙәге белгесе Альбина Хәлилова булды. Ул балаларҙы ҡотлап, ирекмән кенәгәләре тапшырҙы.

Сара барышында унда ҡатнашыусыларҙы “Ҡулға-ҡул тотоношайыҡ, дуҫтар” уйыны көтә ине. Балаларға түбәндәге станциялар тәҡдим ителде: “Мөғжизәләр яланы”, “Пиф-понг”, “Музыка һәр саҡ беҙҙең менән” һәм башҡалар. Беренсе булып барлыҡ һынауҙарҙы ла Яңы Яуыш мәктәбенең “Ҡайнар йөрәктәр” командаһы ҡыҙҙары һәм үҫмер егеттәре үтте (һүрәттә, етәксеһе – Гөлнур Ғүмәрова). Өсөнсө урынды шул уҡ белем биреү учреждениеһының “Йәш гвардия” командаһы алды. Икенсе урында – Йонос мәктәбенең “Шәфҡәтле йөрәктәр” командаһы (Азалия Әхкәмова). Сарала ҡатнашыусыларҙың барыһы ла сертификаттар алды, ә еңеүселәр мәғариф бүлегенең I, II һәм III дәрәжә дипломдары менән бүләкләнде.

Айһылыу ҒӘЛЛӘМШИНА,

Пионерҙар һәм уҡыусылар йортоноң

ойоштороусы педагогы.