Т. Уралбаев: “Муса Гәрәев исемендәге яңы батальонда хеҙмәт итеү – ҙур мәртәбә!”

Был хәрби ҡаҙаныштарҙы ғына түгел, шулай уҡ күп тапҡыр үлемдең күҙҙәренә ҡараған яугирҙың шәхси батырлығын таныу булды.
“Минең батальон 70 процентҡа Башҡортостан хәрбиҙәренән тора. Беҙ Красноармейскиҙы азат итеүҙә ҡатнаштыҡ. Ошо бурысты бергәләп үтәнек. Республика егеттәрен билдәләп үткем килә – улар ҡыйыу, тәрбиәле һәм тәүәккәл геройҙар. Хөрмәтле Радий Фәрит улы! Командованиенан һәм шәхсән үҙемдән иленә һәм халҡына тоғро ошондай хәрби хеҙмәткәрҙәрҙе тәрбиәләүҙәре өсөн рәхмәт әйткем килә. Шулай уҡ Һеҙгә махсус хәрби операция һалдаттарына даими ярҙам күрһәткәнегеҙ өсөн рәхмәт”, – тип билдәләне Тельман Уралбаев.
Хәҙер ул – пилотһыҙ система хеҙмәте начальнигы вазифаһын ваҡытлыса башҡарыусы. Шулай уҡ уны БПЛА башҡорт ирекле батальонын ойоштороу мәсьәләһе өсөн яуаплы итеп тәғәйенләнеләр. Яңы подразделение билдәле яҡташыбыҙ, хәрби летчик, Бөйөк Ватан һуғышында ҡатнашыусы, ике тапҡыр Советтар Союзы Геройы Муса Гәрәевтың исемен йөрөтәсәк.
Рәсәй Геройы Тельман Уралбаев менән “Башинформ” мәғлүмәт агентлығы хәбәрсеһе Эдуард Ҡусҡарбәков менән осрашты.
Яугирҙар осрашыуға орден-миҙалдар тағып килә, ләкин иң тәүҙә иғтибарҙы уларҙың наградалары түгел, ә күҙҙәре йәлеп итә. Уралбаевтың ҡарашы тыныс, иғтибарлы, бер аҙ арығанын күрергә була, әммә теремек булып ҡала. Капитандың йылмайыуы – тыйнаҡ, ләкин эскерһеҙ. Ҡул биреүе ныҡ, был мәлдә алдыңда офиста эшләгән йәиһә йорттар һалған йәш ир түгел, ә исеме махсус хәрби операция тарихына яҙылған хәрби офицер, Рәсәй Геройы икәнлегенә ышаныуы ҡыйын.
Август ҡояшы аҫтында Геройҙың Алтын Йондоҙо балҡый. Тельман Уралбаев Донецк Халыҡ Республикаһындағы Красноармейск ҡалаһын азат иткәне өсөн юғары исемгә лайыҡ. Был маҡсат яугирҙәребеҙ алдында торған иң ҡатмарлы бурыстарҙың береһе булды, сөнки стратегик мөһим ҡаланы дошман ныҡ ҡулға алғайны.
Тельман Уралбаев ул саҡта ҡыйыулыҡ ҡына түгел, ә тактик зирәклек тә күрһәтә. Уның батальоны батырҙарса, көйлө һәм, иң мөһиме, һөҙөмтәле эшләй.
“Был – минең менән бергә барған һәм минең командование аҫтында ошо тораҡ пунктты азат итеү бурысын үтәгән егеттәремдең, һалдаттарымдың, офицерҙарымдың, сержанттарымдың наградаһы. Бик ауыр булһа ла, беҙ был бурысты үтәнек”, – тине ул.
Рәсәй Геройы Тельман Уралбаевҡа “Алтын йондоҙ”ҙо 2026 йылдың февралендә, Ватанды һаҡлаусылар көнө алдынан, РФ Оборона министры Андрей Белоусов тапшырҙы.
Әңгәмә барышында республикала яңы батальон ойоштороу темаһы ла ҡуҙғатылды.
“Ике тапҡыр Советтар Союзы Геройы Муса Гәрәев исемендәге батальонда хеҙмәт итеү – намыҫ һәм ғорурлыҡ ҡына түгел, ҙур яуаплылыҡ та. Унда Башҡортостанда тыуып үҫкәндәр хеҙмәт итәсәк. Бер тораҡ пункттан, ҡаланан йәиһә ҡасабанан булған егеттәр хәрби бурысты бергә, иңгә-иң терәп үтәйәсәк – был үҙ-ара килешеп эш итеүҙә, дуҫлыҡта һәм бер-береңә тоғролоҡта ғәйәт ҙур һынау. Был еңеүгә табан юлда бик көслө һөҙөмтә бирә”, – тип һыҙыҡ өҫтөнә ала Тельман Уралбаев.
Пилотһыҙ осоу аппараттары операторҙарын әҙерләү – бөгөн мөһим тема. Уның һүҙҙәренсә, Рәсәй Оборона министрлығы менән килешеү төҙөр алдынан һәр хәрби хеҙмәткәр махсус һайлау үтә, йәғни дрондар менән эшләү теорияһын һәм практикаһын өйрәнә. Һуңынан буласаҡ дронологтар дислокация пунктына юлланасаҡ, унда уларҙы дөйөм ғәскәри һәм махсус әҙерлек көтә.
“Өйрәтеү өс ай самаһы ваҡытты ала. Әммә минең егеттәрҙең бер аҙна эсендә лә, бер айҙа ла материалды үҙләштереү осраҡтары булды. Беҙҙең инструкторҙар тәжрибәле һәм көслө, яҡшы һөҙөмтәләргә өлгәшә. Улар егеттәрҙе ике айҙа әҙерләп, уларҙан профессиональ яугир эшләй. Әммә күп нәмә контракт буйынса эшләүселәрҙең үҙҙәренән, уның ниндәй маҡсат менән фронтҡа барыуынан тора. Мин 18–30 йәшлек хәрби хеҙмәткәрҙәр йыям. Улар – БПЛА операторҙары. Әммә 30 – 35 йәшкә тиклемге яугирҙар ҙа бар. Улар пилотһыҙ система ғәскәрҙәрендә талап ителгән башҡа һөнәрҙәргә уҡып сыға. Расчет операторҙары, сапёрҙар, водителдәр һәм башҡалар кәрәк”, – ти Тельман Уралбаев.
Күптәрҙе дрон менән идара итеүселәрҙең хәрби ҡағылыу линияһында урынлашыу мәсьәләһе борсоуы бер кемгә лә сер түгел. Әммә бында көсһөҙлөк һәм миһырбанһыҙлыҡ тураһында һүҙ бармай. Мәсьәлә яңы технологиялар менән һөҙөмтәле эшләүгә ҡағыла.
“Хәҙер Рәсәйҙең Ҡораллы көстәре бик юғары һөҙөмтәләргә өлгәшә. БПЛА операторҙары дошмандан дроноводтарға барып етә алмаған алыҫлыҡта эшләй. Ә операторҙар, киреһенсә, дошманды теүәл, аныҡ итеп күрә һәм хәрби бурысты башҡара. Әммә шуны билдәләп үтергә кәрәк: барыһы ла хәрби хеҙмәткәрҙең үҙенән тора. Һиҙгерлек, дөрөҫ эш итеү ғүмерҙе һаҡлап алып ҡалырға ярҙам итә”, – тип билдәләй Тельман Уралбаев.
Ул шулай уҡ контракт шарттарына аныҡлыҡ индерҙе. Махсус контракт бер йылға төҙөлә. Ваҡыты уҙғас, хәрби хеҙмәткәр эштән китеүе мөмкин, түләүҙәр – стандарт, ләкин махсус шарттар ҙа бар.
Мәсетле районы халҡына улар тураһында белеү, шулай уҡ Муса Гәрәев исемендәге батальонда хеҙмәт итеүгә ҡағылышлы башҡа көнүҙәк һорауҙарға яуаптарҙы 8-917-463-18-87 телефоны буйынса белгестән, шулай уҡ Дыуан, Мәсетле һәм Салауат райондарының хәрби комиссариатында 8-917-463-18-87 телефоны буйынса (Мәсәғүт ауылы, Коммунистик урамы, 16) алырға мөмкин.
“Ни өсөн Башҡортостандан йәш егет тап беҙҙең батальонға хеҙмәт итергә барырға тейеш? Был ике тапҡыр Советтар Союзы Геройы полковник Муса Гәрәев исеменә лайыҡ булған бүлексә. Уның составында Донбасты һәм башҡа биләмәләрҙе нацистарҙан азат итеү буйынса хәрби бурыстарҙы үтәү һәм уртаҡ еңеүҙе яҡынайтыу – ҙур хөрмәт”, – тип һөйләй Тельман Уралбаев.
Рәсәй Геройы Ырымбур өлкәһенең Андрианополь ҡасабаһында тыуған. Әйткәндәй, ауылдың исемендә лә рус-төрөк һуғыштарының береһендә Ватан армияһының еңеү тарихы яҙылған. Шуға күрә офицер йөрәгендә еңеүгә ынтылыш тойғоһо булыуы ғәжәп тә түгелдер.
Руслан ағаһы уға өлгө булып тора. Тельман үҙе төп хәрби хеҙмәттән һуң контракт төҙөй, Сүриәлә хеҙмәт итә. Ә 2022 йылда, махсус хәрби операция башланғас, үҙ теләге менән фронтҡа китә. Шул ваҡыттан һалдат взвод командирынан алып батальон командирына тиклем хәрби юл үтә.