Республикабыҙҙан дүрт проектҡа «Агротуризм» программаһы буйынса федераль грантта

Башҡортостан Башлығы Радий Хәбиров социаль селтәрҙәге сәхифәһендә ошо турала хәбәр итә. 2025 йылда республикабыҙҙан 4 фермерға «Агротуризм» программаһы буйынса федераль гранттар тапшырыла, тип өҫтәне ул. Конкурс еңеүселәрен Рәсәй Ауыл хужалығы министрлығы комиссияһы билдәләгән.

Бына ул проекттар:

– «Шәп урын», фермер Русалина Шакирова, Борай районы;

– «Йола – башҡорт традициялары», фермер хужалығы етәксеһе Дамир Иҙиәтуллин, Шишмә районы;

– «Башҡортостан төпкөлөнән», фермер Линар Сөләймәнов, Ғафури районы;

– «Ҡәнифә юлы», фермер Айбулат Раҡаев, Баймаҡ районы.

Дөйөм алғанда, республика вәкилдәре 36,7 миллион һум отҡан. 2023 йылда был сумма 22,7 миллион һум тәшкил иткән, ул ваҡытта ла дүрт проект еңеү яулаған. Грант конкурсының шарттарына ярашлы, унда ауыл хужалығы тауарҙарын етештереүселәр – микро- һәм бәләкәй эшҡыуарлыҡ субъекттары (шәхси ярҙамсы хужалыҡтарҙан тыш) ҡатнаша ала. Гранттың суммаһы – 3-10 миллион һум, ул фермерҙың үҙ проекты өсөн тотонорға йыйынған аҡса күләменә бәйле.

«Агротуризм – беҙҙең өсөн бик мөһим һәм перспективалы йүнәлеш. Башҡортостанда республикабыҙ ҡунаҡтарын йәлеп итерҙәй ауыл биләмәләре байтаҡ. Төбәктең ҡеүәте ҙур, ә фермерҙарҙың уны бойомға ашырыу буйынса креатив идеялары күп», – тип яҙҙы Радий Хәбиров.