Башҡортостанда сүп-сар сығарыу өсөн хаҡтар арта башлай

Бөгөн Башҡортостан Башлығы Радий Хәбиров хөкүмәттәге оператив кәңәшмәлә ошо коммуналь хеҙмәт өсөн түләүҙе арттырырға кәрәклеге тураһында белдерҙе.

Добавить в предпочтительные источники Google

2019 йылдың ғинуарынан республикала әлеге коммуналь хеҙмәт өсөн граждандарға берҙәм билдәләнгән хаҡ индерелгәйне. 2020 йылдың 1 сентябренән ул күтәрелде. Элек бер кешегә 70 һум түләгәндәр өсөн хаҡ 5 һумға артты, хәҙер ул айына – 75 һум, элек 35 һум түләгәндәр өсөн 20 һумға ҡиммәтләнде, бер кешегә – 55 һум. Сумма 2019 йылдың 1 ғинуарына тиклем тораҡ пункттан сүп-сар сығарыуға йәки сығармауға ҡарап билдәләнгән.

Властар белдереүенсә, был дәүмәл – ваҡытлыса.

«Беҙ билдәләгән тариф иҡтисади яҡтан нигеҙләнмәгән, ул күпкә түбәнерәк. Беҙ быға аңлы рәүештә барҙыҡ. Хәҙер бурыстың беренсе этабы үтәлде – сүпте сығара башланылар. Киләһе этапты тормошҡа ашырырға – ҡалдыҡтарҙы эшкәртә башларға кәрәк. Шуға күрә сүп-сар сығарыу өсөн тарифты арттырыуҙың киләһе этабы тураһында уйлау мөһим», — тине Радий Хәбиров.

Яйлап республикала сүп-сар сығарыу өсөн түләү Башҡортостан Республикаһының Тарифтар буйынса дәүләт комитетының биш зона өсөн билдәләгән күләмгә тиклем арттырыла.

«Спецавтохозяйство» предприятиеһы эшмәкәрлеге зонаһында (1-се зона) ҡаты коммуналь ҡалдыҡтар сығарыу өсөн хаҡ күп фатирлы йортта – 75 һум, шәхси өйҙә 76 һумға тиклем була.

«Дюртюлимелиоводстрой» төбәк операторының 2-се зонаһында түләү күп фатирлы йортта — 96 һум, шәхси йортта — 97 һум.

«Экосити» төбәк операторының 3-сө зонаһында хаҡ күп фатирлы йортта — 94 һум, шәхси өйҙә — 96 һум.

4-се зонала («Экология Т» төбәк операторы) түләү күп фатирлы йортта — 95 һум, шәхси йортта— 96 һум

4+ зонала («Дюртюлимелиоводстрой» төбәк операторы) күп фатирлы йортта хаҡ — 104 һум, шәхси өйҙә — 106 һум.

Фото: «Башинформ» мәғлүмәт агентлығы