Тура диалог

Ростов ауыл биләмәһе
Ауыл биләмәһенең өс ауылында 644 кеше йәшәй, шуларҙың 197-һе – хаҡлы ялда, 41-е – балалар.
Уҙған йылда башҡарылған эштәр тураһында хәбәр итеп, ауыл биләмәһе хакимиәте башлығы Ирек Ғәлимов янғын хәүефһеҙлегенә иғтибарҙы йүнәлтте. Бында һәр ғаиләгә тиерлек (шул иҫәптән яңғыҙ йәшәгән пенсионерҙарға, балалы ғаиләләргә, һаулыҡ мөмкинлектәре сикләнгән кешеләргә) янғын тураһында хәбәр итеүсе автономлы прибор бирелгән. Әммә йорттар буйлап һуңғы рейдтарҙан күренеүенсә, уны алып ҡуйыу осраҡтары бар, сөнки бер йыл үткәс батарейканың көсө бөтә һәм хәбәр итеүсе ҡоролма туҡтауһыҙ сигнал бирә. Башлыҡ биләмә халҡын үҙ именлектәренә етди ҡарарға һәм ҡоролманың батарейкаларын ваҡытында алмаштырып торорға саҡырҙы.
2024 йылда ауыл биләмәһе территорияһында төҙөкләндереү эштәре үткәрелгән.
Ишәле ауылында “Урындағы башланғыстарға ярҙам” программаһы нигеҙендә зыяратты төҙөкләндереүгә 830 мең һум күләмендә аҡса кәрәк булған, ауыл халҡы һәм унда тыуып ситтә йәшәүселәр кәрәкле сумманан да күберәк аҡса йыйған, ҡалғанына будка төҙөгәндәр һәм баннер һатып алғандар. Фәрдиән Мөхәрмәтовтың улдары матур ҡапҡа ҡуйған.
Имам-хәҙрәт Данил Зәки улы Теләш ауылында мәсетте ремонтлау инициативаһы менән сығыш яһаған. Ҡыйыҡ буятылған, солан ҡыйығы профтүшәмә менән ҡапланған һәм стеналар көпләнгән, яңы мейес һалынған, бина эсендә косметик ремонт үткәрелгән, ҡойма һәм ҡапҡа буятылған.
Ирек Мәғәрүф улы был изге эштәрҙә ҡатнашҡан барлыҡ халыҡҡа рәхмәт белдерҙе.
Яҙғы ташҡын ваҡытында Теләш ауылында быуа ярын һыу йыуа һәм һыу кимәле ныҡ кәмей. Депутат Ким Мансуров ҡыҫҡа ваҡыт эсендә ремонт эштәрен ойоштора. Алик Альберт улы, Рафиҡ Рафаэль улы, Фәнил Исмәғил улы, Исламғәли Исламгәрәй улы, Рәфҡәт Исмәғил улы, Фидус Суфиян улы тракторҙарында ярҙам күрһәтәләр. Ауыл халҡының яйға һалынған эше һөҙөмтәһендә быуа тергеҙелә һәм унда балыҡтар барлыҡҡа килә.
Шулай уҡ Тәкә ауылында быуа ойоштороу буйынса эштәр алып барыла. Ул матурлыҡ өсөн генә түгел, ә янғын һүндереү ваҡиғаһында һыу сығанағы булараҡ та кәрәк. Был эштәрҙең инициаторҙары булып ошо уҡ ауыл кешеләре Рәфҡәт Рәхимов һәм староста Әнүәр Әхкәмов сығыш яһай. Быйыл башланған эште тамамлау күҙаллана.
Ауыл халҡы МХО яугирҙарына гуманитар ярҙам йыйыуҙа әүҙем ҡатнаша. Ойоҡбаш бәйләйҙәр, блиндаж шәмдәре эшләйҙәр, маскировка селтәрҙәре үрәләр һәм башҡа эштәр башҡаралар. Ошо көндәрҙә Валерьян Вәзиров 10 кубометр таҡта ебәргән. Ҡыҙғанысҡа ҡаршы, һуғыш юғалтыуҙарға ла килтерә. Һәләк булған яугирҙарҙы бер минут тынлыҡ менән иҫкә алдылар.
Һуңынан ауыл биләмәһе хакимиәте башлығы 2025 йылға пландарын иғлан итте: Тәкә һәм Теләш ауылдарында ҡаты көнкүреш ҡалдыҡтарын йыйыу өсөн яңы контейнер майҙансыҡтары төҙөү, өс майҙансыҡты ремонтлау, Ишәле ауылында күперҙе ремонтлауҙы дауам итеү, ауылдарҙа урамдарҙы яҡтыртыу өсөн бағана ҡуйыу.
Мәсетле районында 2024 йылда башҡарылған эштәр тураһында район хакимиәте башлығының ауыл хужалығы буйынса урынбаҫары Вадим Саҙиҡов хәбәр итте.
Артабан регламент буйынса һорау-яуап форматында диалог уҙҙы. Халыҡ Оло Ыҡтамаҡ-Тәкә ауылы маршрутын тергеҙеү менән ҡыҙыҡһынды, ауыл биләмәһе юлдары, ауыл-ара юлдар, Яңы Мөслим ауылында күперҙе ремонтлау, Тәкә ауылында магазин асыу тураһында һорауҙар бирҙе, Ишәле һәм Тәкә ауылдарында кәрәҙле элемтә юҡлығын билдәләне.
Күп һорауҙарға ентекле яуаптар бирелде, ҡалғандары контролгә алынды.
Йыйылыш аҙағында Ростов ауыл советы ауыл биләмәһе тормошонда әүҙем эшмәкәрлеге өсөн Мәсетле районы хакимиәтенең Рәхмәт хаты менән Фәниә Тәхәүетдинова, Ростов ауыл советы ауыл биләмәһе хакимиәтенең һәм Советының рәхмәт хаты менән Тимерғәзи Фәрхетдинов, Ким Мансуров, Әнүәр Әхкәмов бүләкләнде.
Сара һуңында алтын туйҙарын билдәләгән Люция Ғәни ҡыҙы менән Марсель Яҡуп улы Закирйәновтарҙы тантаналы ҡотланылар.
Эльвира БАҺАУЕТДИНОВА.