Районда юл соҡорҙарын ямау дауам итә

Төҙөлөш һәм йәшәйеште тәьмин итеү мәсьәләләре буйынса баш белгес Альберт Ғилметдиновтың һүҙҙәренсә, ошо йылдың апреленән бөгөнгә тиклем 1800 кв. метрҙа соҡорҙар ямалған, унда 200 тоннанан ашыу асфальт-бетон ҡатышмаһы файҙаланылған.

Әлеге эштәр төбәк әһәмиәтендәге, муниципаль һәм урындағы юлдарҙа башҡарылған.

Яҡындағы пландарҙа – Ленин, Төҙөлөш һәм Тыныслыҡ урамдары ихаталарында һәм торлаҡ зоналарында ремонт яһау. Был территорияларҙа нигеҙҙә һәр фатирҙы айырым йылытыуға күсеү проектын бойомға ашырған ваҡытта боҙол-ған участкаларҙы йүнәтеү күҙ уңында тотола.

Әйтергә кәрәк, планлаштырылған юл ҡатламы ремонты менән бер рәттән Оло Ыҡтамаҡ ауыл биләмәһенең төҙөкләндереү хеҙмәте бригадаһы һәм Мәсетле юл ремонт-төҙөлөш идаралығы хеҙмәткәрҙәре тарафынан “Юл эксперты” мобиль ҡушымтаһы аша Интерактив картаға килгән мөрәжәғәттәр буйынса эштәр башҡарыла. Әлеге мәлдә район буйынса юл ҡатламын ремонтлауға 138 заявка килгән, шуларҙың 3-әүһе – яңы, 67-һе – үтәлгән, тағы ла 60-ы – эшләнә, 8-е – кире ҡағылған. Иҫегеҙгә төшөрәбеҙ: һәр бер район кешеһе картала билдәләп һәм ҙур булмаған заявка формаһын тултырып, проблемалы участканың фотоһын ҡушып һалып, юл хеҙмәттәренә юл полотноһына ағымдағы ремонтты нәтижәлерәк үткәрергә ярҙам итә ала.