Мелиораторҙар урамында яңы тротуар һәм хәүефһеҙ туҡталыш

Башҡортостан Республикаһы Хөкүмәте ҡарары менән раҫланған “Башҡортостан Республикаһының ауыл биләмәләрен комплекслы үҫтереү” дәүләт программаһы 2020 йылда уҡ эшләй башланы. Уның төп йүнәлештәре: торлаҡ, социаль объекттар, инфраструктура төҙөү һәм биләмәләрҙе төҙөкләндереү.
Биш йыл эсендә Башҡортостанда “Ауыл биләмәләрен комплекслы үҫтереү” дәүләт программаһын финанслауҙың дөйөм күләме 9,4 миллиард һум самаһы тәшкил итте, шуның 5,4 миллиард һумын федераль бюджеттан йәлеп итеү мөмкин булды. Был хаҡта төбәктең вице-премьеры – ауыл хужалығы министры Илшат Фәзрахманов хәбәр итте.
Мәсетле районында урындағы белгестәр программаны әүҙем индерә, һөҙөмтәләре һиҙелерлек.
– Йыл һайын беҙ үҙебеҙҙең әһәмиәтле проекттар менән программала ҡатнашабыҙ һәм, ҡағиҙә булараҡ, ыңғай һөҙөмтәләргә өлгәшәбеҙ, – тип билдәләй хакимиәт башлығының төҙөлөш һәм йәшәйеште тәьмин итеү мәсьәләләре буйынса урынбаҫары Азамат Ҡәләмов. – Шулай итеп, даими рәүештә яңы объекттарҙы ғәмәлгә ашырабыҙ һәм граждандар өсөн мөмкинлектәрҙе киңәйтәбеҙ. Мәҫәлән, 2024 йылда үҙәк район дауаханаһы табибына “Торлаҡ төҙөү” йүнәлеше буйынса өй төҙөлә, 2023 йылда Оло Ыҡтамаҡ ауылының төньяҡ өлөшөндә контейнер майҙансыҡтары ҡуйыла. Быйыл программа буйынса Оло Ыҡтамаҡ ауылының Мелиораторҙар урамында 640 метр оҙонлоҡта яңы тротуар һалынды. Объект төҙөлөшөнә 3,427 миллион һум бүленгән, шуларҙың 65 проценты – федераль һәм республика бюджеттарынан, 32% – муниципаль бюджеттан һәм 3% – бюджеттан тыш финанслау сығанаҡтарынан.
– Мелиораторҙар урамында тротуар һалыуға контракт “Тепловик” йәмғиәте менән төҙөлдө. Эш барышында ҙур ҡатмарлыҡтар барлыҡҡа килде. Урамдың тығыҙ төҙөлөүе һәм ер аҫты элемтә линиялары булыуы арҡаһында тротуарҙы теләгән урында һалыу мөмкин түгел. Шулай уҡ буласаҡ тротуарҙың нигеҙен булдырыу өсөн күп күләмдә тупраҡ талап ителде. Урамды төҙөкләндереү буйынса бөтә эштәр төҙөлөш нормалары һәм ҡағиҙәләре талаптарына ярашлы башҡарылды. Шулай уҡ был объект юл хәрәкәте хәүефһеҙлеген тәьмин итеү өсөн Башҡорт гимназияһы эргәһендә автобус туҡталышы менән берләштерелде. Эштәрҙең хаҡы урындағы бюджет иҫәбенә 100 мең һум самаһы тәшкил итте, – тип һөйләне Азамат Мөхәмәтхаяз улы.
Район хакимиәтенең юл эшмәкәрлеге һәм ташыу мәсьәләләре буйынса баш белгесе Вадим Хәбибуллин:
– Балаларҙы йөрөтөү өсөн юл хәрәкәте хәүефһеҙлеген тәьмин итеү маҡсатында Башҡорт гимназияһы эргәһендә автобус туҡталышы булдырылды. Әлеге ваҡытта эштәр тамамланмаған, Йәштәр һәм Мелиораторҙар урамдары араһында, шулай уҡ Ватолин урамы янында йәйәүлеләр үткәүелен төҙөкләндереү, юл билдәләрен ҡуйыу планлаштырыла. Бөтә эштәр ҙә быйыл тамамланырға тейеш.
Азамат Ҡәләмов һүҙҙәренсә, тротуарҙы төҙөкләндереү киләһе йылда ла дауам итәсәк. Шулай уҡ артабанғы йылдарҙа Салауат Юлаев һәм Тракт урамдары буйлап тротуарҙар һалыу, Оло Ыҡтамаҡ ауылының төньяҡ өлөшөндә һәм Тыныслыҡ урамдарында универсаль майҙансыҡтар төҙөү кеүек яңы проекттарҙы тормошҡа ашырыу өсөн ғаризалар бирелгән.
Шул арала
Башҡортостанда “Башҡортостан Республикаһының ауыл биләмәләрен комплекслы үҫтереү” дәүләт программаһына үҙгәрештәр индерелде.
2030 йылға ауылдарҙа төҙөкләндерелгән торлаҡ биналарҙың дөйөм майҙаны өлөшө 50 процентҡа тиклем артырға тейеш. Элек был күрһәткес 49,84% тәшкил иткән.
2030 йылға ауыл биләмәләре һәм ауыл агломерацияларындағы республика халҡы өлөшө халыҡтың дөйөм һанынан 40,06 процент кимәлендә һаҡланырға тейеш (элек 38,04% ине).
Бынан тыш, 2030 йылға ауыл һәм ҡала хужалыҡтарының уртаса айлыҡ ресурстары нисбәте 80,5 процентҡа етеүен тәьмин итеү планлаштырыла. Әлегә тиклем 68,08% нисбәтте тәьмин итеү ҡаралған, йәғни артыу 11,7% тәшкил итәсәк.
– Муниципалитет башлыҡтарына был программала әүҙемерәк ҡатнашырға кәрәк, – тип йомғаҡ яһаны Радий Хәбиров. – Инициатива булған ерҙә яҡшы объекттар барлыҡҡа килеүен үҙегеҙ күрәһегеҙ.
Рәмил МАЙДАНОВ.