Стадиондағы яңы майҙансыҡ халыҡҡа шатлыҡ килтерә

Муниципалитеттарҙы үҫтереү программаларын бойомға ашырғанда торама пункттарҙың тышҡы торошо тураһында ла уйларға кәрәк, уңайлы йәмәғәт мөхитен булдырыу – мөһим бурыстарҙың береһе, тип билдәләне Радий Хәбиров республика Башлығы сифатында эш башлағанда.
2022 йылда Оло Ыҡтамаҡ ауылының “Атлант” стадионында “Хеҙмәткә һәм оборонаға әҙер” Бөтә Рәсәй физкультура-һауыҡтырыу комплексы нормативтарын тапшырыу өсөн бәләкәй майҙансыҡ барлыҡҡа килде. Яңы объект “Демография” милли проектының “Спорт – йәшәү нормаһы” федераль проекты ярҙамында ҡуйылды.
Майҙансыҡта теләгән һәр кем шөғөлләнә ала. ГТО дәүләт стандарттарын иҫәпкә алып һайлап алынған ҡорамал ярыш һәм нормативтар тапшырыуға бөтә яҡтан әҙерләнеү мөмкинлеге бирә. Тренажерҙар йыйылмаһы бәләкәй майҙанда урынлашҡан, өҫтәүенә мөмкин булған функциональ йөкләмә лә бар.
Беҙ улдары менән стадионға килгән Екатеринбург ҡалаһында йәшәүсе Анна Панкова менән һөйләштек.
– Мин Оло Ыҡтамаҡта тыуып үҫтем, хәҙер йәй һайын отпускыла балаларым менән атай-әсәйемә ҡайтабыҙ. Беҙгә буш ваҡытыбыҙҙы “Атлант”та үткәреү бик оҡшай, малайҙар турник һәм һайғауҙарҙа ихлас шөғөлләнә, башҡа балалар менән аралаша. Физик форманы тренажерҙар ярҙамында яҡшыртыу мөмкинлеге барлыҡҡа килеүе бик яҡшы. Элек улдарым ата-әсәйемдең шәхси йорто ихатаһында уйнаны, унда мөмкинлектәр аҙ булды. Хәҙер беҙ ҙур теләк менән стадионға барабыҙ, уларға унда шөғөлләнеү һәм уйнау оҡшағанын беләм, – тип һөйләй ул.
Майҙансыҡта шулай уҡ халыҡ инвентарҙы һаҡсыл файҙаланһын өсөн видеокүҙәтеү ҡуйылған.

– Шуныһы ҡыуаныслы, республика етәкселеге төбәктең Төньяҡ-Көнсығышына иғтибар итә. “Атлант” стадионында ГТО тапшырыу өсөн ҡорамалдар һатып алыуға 3886283 һум тотонолдо, – тип билдәләне Мәсетле районы хакимиәтенең йәштәр сәйәсәте һәм спорт секторы мөдире Марат Ханнанов. 

Екатерина ӘМИРОВА.