Әжекәй клубын яңыртыу эштәре тулы ҡеүәттә бара

– Мәҙәниәттең сиге юҡ. Был – гражданлыҡҡа, милләт, дин төрөнә ҡарамай кешеләрҙе берләштергән инструмент, – тине Башҡортостан Башлығы Радий Хәбиров 2021 йылда “Арт-Ҡоролтай” мәҙәни форумында сығыш яһап.
Быйыл Мәсетле районында яңыртыу эштәре уҙған быуаттың 70-се йылдарында төҙөлгән, 750 кешегә иҫәпләнгән Әжекәй ауылы клубында бара. Бинаға күптән ремонт талап ителә ине.
Уҙған йылдың көҙөндә Башҡортостан Республикаһының Мәҙәниәт министрлығында субсидия биреү буйынса комиссия ултырышы уҙҙы. Әжекәй ауыл мәҙәниәт йорто “Реновация” (капиталь ремонт һәм матди-техник базаны нығытыу) йүнәлеше буйынса конкурс буйынса һайлап алыу үтте.
“Мәҙәниәт” милли проекты арҡаһында шәхси эшҡыуар Екатерина Мазманяндың подряд ойошмаһы бинаның ҡыйығын һәм фасадын капиталь ремонтланы, шулай уҡ эшселәр бинаның беренсе ҡатында эске биҙәү эштәрен башҡарған. Бөгөнгө көнгә планлаштырылған эштәрҙән инеү төркөмөн үҙгәртеп ҡороу һәм һыу менән тәьмин итеү, һыуҙы ағыҙыу системаларын монтажлау ҡалған.
– Хәҙер мәҙәниәт йортонда һәр кеше үҙен уңайлы тойһон өсөн бөтә уңайлыҡтар бар. Бинаға инеү урыны киң ишек уйымы менән буласаҡ, ул бинаға кресло-коляскала ҡаршылыҡһыҙ үтергә мөмкинлек бирәсәк, – тип һөйләне клуб мөдире Илүзә Әсбәпова.
Коридорҙағы иҙән япмаһы ҡағылыу, механик тәьҫир итеү тойғоһонда хәрәкәт итеү өсөн махсус туҡыма менән эшләнгән. Ул күреү һәләте буйынса инвалидтар өсөн күрһәткес-тәрҙең бер төрө булып тора, уның ярҙамында күреү һәләте насар булған кешеләр бина эсендә хәүефһеҙ йөрөй ала, шулай уҡ ул һуҡыр кешенең юлында сикләүҙәрҙе билдәләү өсөн тәғәйенләнгән.
Мөмкинлектәре сикләнгән кешеләр өсөн тотҡалы санузел да йыһазландырылған.
Контракт буйынса эштәрҙең хаҡы 10 миллион һумдан ашыу тәшкил итә. Подрядсы ремонтты быйыл ноябрҙә тамамларға ниәтләй.
– Әжекәй ауылының бөтә мөһим саралары ауыл мәҙәниәт йортонда үтә. Был ауылда төрлө йәштәге, төрлө ҡыҙыҡһыныуҙары булған кешеләр бергә йыйылып, ваҡытын файҙалы һәм рәхәтләнеп үткәрә алған берҙән-бер урын. Клубҡа ремонт талап ителә ине, ауыл биләмәһе бюджеты менән генә уны тормошҡа ашырыу мөмкин түгел. Әммә федераль һәм республика кимәлендәге ярҙам менән клуб хеҙмәткәрҙәренең һәм ауыл халҡының хыялдары тормошҡа аша.
2022 йылда Әжекәй ауыл мәҙәниәт йорто “Кесе ватан мәҙәниәте” милли проекты сиктәрендә финанслау алғайны. Был учреждениеның матди-техник базаһын яңыртырға мөмкинлек бир-ҙе. Хәҙер бинала бейеү залы, балалар бүлмәһе, велосипед тренажерҙары, йүгереү юлы, көс тренажерҙары, шахмат, шашка, бильярд һәм теннис өҫтәле бар, – тип һөйләне Оло Ыҡтамаҡ ауыл биләмәһе башлығы Марат Шәйәхмәтов.
Нурания ӘБДРӘХИМОВА.