Еңеүҙәргә юлды бала саҡтан һала

Саңғы спортына һөйөү ғаиләнән килә. Был мауығыу Ҡәләмовтар ғаиләһендә ысын традицияға әүерелгән. Илназ саңғыға бала сағында уҡ баҫа. 5-се класта йәш спортсы был спорт төрө менән тренер Сергей Кустиков етәкселегендә ныҡлап шөғөлләнә башлай. Тап шул ваҡытта уның потенциалы һәм ныҡлап мауығыуы барлыҡҡа килә.
Һуңыраҡ Илназ еңел атлетика менән шөғөлләнә башлай. Быға уны спортсы ағаһы Айнур илһамландыра. Шулай итеп, егет йүгереү юлына баҫа һәм яңы спорт ҡаҙаныштарына ирешә.
– Ағайым миңә потенциалым барлығын һәм үҙемде һынап ҡарарға кәрәклеген әйтте. Бының өсөн уға бик рәхмәтлемен, – тип һөйләй йәш спортсы.
Әммә ысын уңыш 2022 йылда килә, ул саҡта Илназ яңы спорт төрөндә – биатлонда тәү тапҡыр сығыш яһай. Шул уҡ йылда үҫмер кросс-спринт буйынса Башҡортостан беренселеге этабында беренсе урын яулай һәм үҫмерҙәр араһында биатлон буйынса Рәсәй беренселегенә һайлап алына. Был уның талантын һәм ныҡышмалылығын раҫлай. Формаһын һаҡлап ҡалыу һәм үҙ оҫталығын камиллаштырыу өсөн Илназ даими рәүештә Олимпия резервы мәктәбе ойошторған спорт йыйындарына йөрөй. Быйыл йәй ул Октябрьский һәм Өфө ҡалаларында күнекмәләрҙә була, унда үҙенең техникаһын камиллаштыра, республика чемпионатында ҡатнашып, 14-се урын биләй. Илназ еңел атлетика буйынса зональ ярыштарҙа ҡатнашырға ярата, әммә, ҡыҙғанысҡа ҡаршы, быйыл ул йәш сикләүҙәре арҡаһында бара алмай.
Илназдың тормошо спорт менән генә сикләнмәй. Ул музыка менән мауыға: гитарала, баянда уйнай. Балалар сәнғәт музыка мәктәбен тамамлаған, унда был инструменттарҙа уйнау өсөн кәрәкле күнекмәләр һәм белем алған. Бынан тыш, егет хоккей өсөн дә ваҡыт таба, ҡыҙыҡһыныуҙары һәм мауығыуҙары күп яҡлы булыуын күрһәтә.
Илназдың һуңғы арала ирешкән ҡаҙаныштарының береһе – 24 августа Силәбелә үткән йүгереүҙә ҡатнашыу. Ағаһы Айнурҙың ҡатыны Лариса бер километр араны уңышлы үтә. Атаһы менән ағаһы – биш километр, ә Илназ 10 километр дистанцияла яҡшы һөҙөмтә күрһәтә. Был юлы әсәһе ҡатнаша алмай. Шәхси иҫәптә Илназ Башҡортостан буйынса “12–18 йәшлек егеттәр” категорияһында 37 минут 21 секунд һөҙөмтәһе менән икенсе урын яулай. Шуны ла билдәләп үтергә кәрәк: былтыр ошо уҡ ярышта үҙ категорияһында өсөнсө урынға сыға.
Атаһы менән әсәһенең хуп-лап тороуҙары уға уңышҡа ирешергә ярҙам итә.
Илназға күнекмәләрҙә ағаһы ярҙам итә, ул бер аҙ туҡтап торғандан һуң спортҡа кире ҡайта һәм хәҙер еңел атлетика менән әүҙем шөғөлләнә, Силәбелә йүгереү клубы ағзаһы булып тора. Студент тормошона тиклем профессиональ рәүештә саңғы спорты менән шөғөлләнә.
Шуны ла билдәләп үтергә кәрәк: Илназдың атаһы, Мәсетле районы хакимиәте башлығының төҙөлөш һәм йәшәйеште тәьмин итеү мәсьәләләре буйынса урынбаҫары вазифаһын биләгән Азамат Мөхәмәтхаяз улы, йәш сағынан спорт менән дуҫ, айырыуса саңғы спортын яҡын күрә һәм саңғы ярыштарында даими ҡатнаша. Әсәһе Зәлифә Рәҡип ҡыҙы ире һәм балалары менән бергә йүгерә, ғаиләлә спорт рухын һаҡлай.
Камилла МУСАКӘЛИМОВА.