“Милләт кросы” – еңеүҙәр һәм ҡаҙаныштар

Спорт сараһын Мәсетле районы хакимиәте башлығы Әнис Әсәҙуллин асты. Ул спорт һөйөүселәргә һәм сәләмәт йәшәү рәүеше алып барыусыларға ныҡлы һаулыҡ, уңышлы старт һәм еңеү теләне.
Йүгерергә яратыусылар өсөн 400, 800, 1000 һәм 1500 метр арауыҡтар ҡаралғайны. Стартҡа дүрт йәш төркөмө вәкилдәре сыҡты.
Йәшкә һәм әҙерлек айырмаһына ҡарамаҫтан, барлыҡ йүгереүселәр ҡуйылған бурысты үтәп сыҡты. Һәр береһе дистанцияны тулыһынса уҙҙы, конкуренция юғары булды. Финишта уларҙы дуҫтары, тренерҙары һәм башҡа ҡатнашыусылар хуплап алҡышланы.
Спортсылар финишҡа түбәндәге тәртиптә килде:
2011 йылғы һәм унан кесерәк ҡыҙҙар араһында (дистанция – 400 м) финишҡа беренсе булып Айгүзәл Исмәғилева (Дыуан-Мәсетле ауылы) килде, икенсе урынды Мәҙинә Мөбәрәкшина (Дыуан-Мәсетле) яуланы, өсөнсө урынды Риана Ҡәйүмова (лицей) менән Лиана Лялина (Ҡорғат) бүлеште. Малайҙар араһында (800 м) Радик Сәйфуллин (Ләмәҙтамаҡ) иң яҡшы һөҙөмтә күрһәтте, икенсе урында – Ярослав Оплеснин (лицей), өсөнсөлә – Артур Зиннәтуллин (лицей).
2009 – 2010 йылғылар төркөмөндә ҡыҙҙар араһында (800 м) беренсе урынды Диана Мостафина (Башҡорт гимназияһы), икенсене – Арина Кашапова (лицей), өсөнсөнө Руслана Мусеибова (Дыуан-Мәсетле) яуланы. Егеттәр араһында (1000 м) беренсе урынды Радмир Зәбихуллин (Ләмәҙтамаҡ) яуланы, икенсе булып Илназ Рәхимов (Ләмәҙтамаҡ) килде, өсөнсөлә – Илһам Мөхәмәтйәнов (лицей).
2007 – 2008 йылғылар төркөмөндә ҡыҙҙар араһында беренсе булып финишҡа Рената Хәнипова (Оло Аҡа) килде, икенсе – Ильвина Ғарипова (Оло Аҡа). Егеттәр араһында (1500 м) финишҡа тәүгеләрҙән булып Илназ Ҡәләмов (лицей) килде, икенсе урында – Илья Паначев (Дыуан күп профилле колледжының Оло Ыҡтамаҡ филиалы), өсөнсөлә – Мөхәмәт Маликов (Башҡорт гимназияһы).
2006 йылғылар һәм унан өлкәнерәктәр төркөмөндә ҡатын-ҡыҙҙар араһында беренсе урынды Римма Ковина (район Мәҙәниәт һарайы), икенсене – Вера Чебыкина (Дыуан күп профилле колледжының Оло Ыҡтамаҡ филиалы), өсөнсөнө Нәргизә Хөснуллина (Дыуан күп профилле колледжының Оло Ыҡтамаҡ филиалы) яуланы. Ир-егеттәр араһында (1500 м) беренсе булып Антон Макаренко (Оло Ыҡтамаҡ) килде, икенсе урында – Владислав Исмәғилев (Дыуан күп профилле колледжының Оло Ыҡтамаҡ филиалы), өсөнсөлә – Тимур Бәҙретдинов (Балалар-үҫмерҙәр спорт мәктәбе).
Ярыш тантаналы тамамланды, унда иң яҡшы спортсыларға миҙалдар һәм грамоталар тапшырылды. Кросс һөҙөмтәләре ГТО Бөтә Рәсәй физкультура-спорт комплексы нормативтары иҫәбенә инә.
Ләйсән АБЗАНОВА.