Дин әһелдәре – сәләмәт йәшәү рәүеше өсөн

Башҡортостан митрополияһы ойошторған “Саңғы старты-2022” конфессия-ара һәүәҫкәр спорт-һауыҡтырыу сараһы “Биатлон” спорт сәләмәтләндереү комплексында үтте. Унда Рус православие сиркәүе, Рәсәй мосолмандарының Үҙәк диниә назараты, Башҡортостан Республикаһы мосолмандарының Диниә назараты спорт командалары ҡатнашты. Башҡортостан мосолмандарының Диниә назараты командаһы составына Һабанаҡ ауылынан Илшат һәм Айнур Зәбихуллиндар, Тимур Зарипов, Йыланыштан Айрат Борханов инде.
Старт алдынан Өфө епархияһының миссионер бүлеге етәксеһе иерей Дионисий Ефимов ҡатнашыусыларҙы сәләмләне, физик культура менән шөғөлләнеүҙең мөһимлеге тураһында һөйләне һәм ярышта ҡатнашыусыларға уңыштар теләне.
Беренсе этапта һәүәҫкәр спортсылар ике километрлыҡ дистанцияла шәхси уҙышта ярышты. Икенсе этап – өс километрға йүгереү эстафетаһы. Һәр команданан өс спортсы сығыш яһаны.
Башҡортостан мосолмандарының Диниә назараты командаһы өсөнсө урын алды. Уның һөҙөмтәләре – 9 минут 33 секунд. Ярыштар тамамланғас, сәй эсеү ойошторолдо һәм ҡатнашыусылар бүләкләнде. Сара ғәҙәттәгесә беҙҙең төбәккә хас конфессия-ара дуҫлыҡ мөхитендә уҙҙы.
Спорт байрамында Башҡортостан Республикаһы мосолмандары Диниә назараты рәйесе мөфтөй Айнур Бирғәлин ҡатнашты. Ул грамоталар, кубоктар, миҙалдар тапшырҙы һәм призерҙарҙы ҡотланы. Бөтә ҡатнашыусыларға мөрәжәғәт итеп, мөфтөй бер-береһе менән татыулыҡта йәшәүҙең һәм ярҙамға мохтаждарҙың барыһына ла ярҙам итеүҙең мөһимлеген билдәләне.
– Республикабыҙҙа конфессиялар араһындағы мөнәсәбәттәр дуҫлыҡ һәм дуҫлыҡ өлгөһө булырға тейеш. Шулай уҡ бер-берең менән аралашыу, физкультура, спорт менән шөғөлләнеү һәм сәләмәт йәшәү рәүеше алып барыу мөһим, – тип билдәләне ул.
Нәркәс ХӘЛИУЛЛИНА әҙерләне.