“Алтын скальпель” кем ҡулында?

Быйыл Башҡортостан дәүләт медицина университеты кли­никаһының бүлексә мөдире, табип-торакаль хирург, медицина фәндәре докторы, профессор Артур Авзалетдинов “Алтын скальпель” премияһына лайыҡ булды. Ул яһаған үҙенсәлекле хирургия операцияһы быға тиклем Рәсәйҙә үткәрелмәгән. Хирург, тәүге тапҡыр робот ярҙамында ҡыҙыл үңәстең бер өлөшөн алып ташлап, уны ашҡаҙан менән тоташтыра алған. Әмәлиәтте бер юлы күкрәк ситлеге өлкәһендә лә, ҡорһаҡ өлөшөндә лә башҡарырға тура килгән. Ҡатмарлы эште атҡарыу­ға алты сәғәт ваҡыт талап ителгән. “Артур Марс улы – үҙ эшенең танылған оҫтаһы. Ул яңы быуын дауалау сараһы – роботлаштырылған хирургия менән эш итә, инновациялы технологиялар менән бергә медицина белемен ҡуллана. Артур Авзалетдинов үткәргән робот-ассистентлы операциялар уның визит карточкаһына әүерелде”, –  табипҡа “Алтын скальпель” тапшырғанда, Башҡортостан Башлығы Хакимиәте етәксеһе Максим Забелин уның эшмәкәр­легенә ошондай юғары баһа бирҙе.

Башҡортостан хирургтары ассоциацияһы 1997 йылда булдырған “Алтын скальпель” премияһы – һаулыҡ һаҡлау өлкәһендә табиптар эшмәкәр­легенә бирелгән иң ҙур баһа. Скальпель – хирургтың төп ҡоралы, шуға күрә тап ул юғары награданың символы булып тора.

Фото:БР Һаулыҡ һаҡлау министрлығы.

Источник: https://bashgazet.ru/articles/s-l-m-t-bulayy/2022-12-20/altyn-skalpel-kem-ulynda-3080062