Сентябрь башынан ниндәй үҙгәрештәр көтөлә?

Барлыҡ башланғыс класс уҡыусылары бушлай ашатыласаҡ
1 сентябрҙән дәүләт һәм муниципаль башланғыс белем биреү мәктәптәрендә белем алыусылар көнөнә кәмендә бер тапҡыр бушлай ҡайнар аш менән тәьмин ителә. Төбәктәр бының өсөн федераль ҡаҙнанан субсидия аласаҡ.

Мәғариф өлкәһендә тәрбиә эше
1 сентябрҙән үҙ көсөнә инәсәк Федераль закон “тәрбиәләү” төшөнсәһенә аныҡлыҡ индерә һәм тәрбиәләү эшен ойоштороу механизмын асыҡлай. Ул 2021 йылдың 1 сентябренә тиклем бөтә белем биреү программаһының бер өлөшө булырға тейеш.
Ул уҡыусыларҙы рухи, әхлаҡи һәм интеллектуаль яҡтан үҫтереүгә, уларҙа ватансылыҡ һәм гражданлыҡ тойғоһон тәрбиәләүгә, Ватанды һаҡлаусыларға, өлкән быуынға һәм кеше хеҙмәтенә ҡарата хөрмәт уятыуға булышлыҡ итәсәк.

Бер туғандар айырым уҡымаясаҡ
Быйылғы уҡыу йылынан бала ағаһы йәки апаһы йөрөгән балалар баҡсаһына йәки мәктәпкә барыу хоҡуғына эйә. Бындай закон 2019 йылдың 2 декабрендә Рәсәй Президенты тарафынан ҡабул ителде.

Социаль заказ
Бындай закон 1 сентябрҙән үҙ көсөнә инә һәм ул дәүләттән социаль ярҙам алыу хоҡуғына эйә бөтә льготасыларға ҡағыла. Уларға кәрәкле тауар йәки хеҙмәт өсөн махсус реестрҙан үҙ аллы һайлаған ойошмаға түләү хоҡуғын биргән социаль сертификат тапшырыласаҡ.
Ярҙамды биреү тәртибен һәм шартын төбәк хөкүмәте раҫлай, шуға күрә улар льготаға эйә граждандың йәшәү урынына бәйле айырылырға мөмкин.

Страховканы кире ҡайтарыу
Закон 1 сентябрҙән кредиттарын алдан түләп бөткән граждандарға страховканың бер өлөшөн ҡайтарып алыу мөмкинлеген бирә. “Элек кешеләргә страховканың бер өлөшөн ҡайтарыу хоҡуғын суд аша раҫларға тура килгән осраҡтар йыш булды”, – тип билдәләне Дәүләт Думаһы Рәйесе Вячеслав Володин.

Банкротлыҡтың судтан тыш механизмы
1 сентябрҙән граждан бушлай һәм судтан тыш үҙен банкрот итеп иғлан итә ала, әгәр ҙә: бурыс күләме 50 меңдән 500 мең һумға тиклем булған осраҡта; түләтеү өсөн пристав бер нәмә лә (мөлкәт, аҡса) тапмаһа.

Һунарға ҡағылышлы ҡағиҙәләр
Башҡортостанда 1 сентябрҙән яңы һунар ҡағиҙәләре урынлаштырыла. Республика Башлығы Радий Хәбиров ошо хаҡтағы бойороҡҡа ҡул ҡуй-ҙы. Документ рәсми хоҡуҡи һәм мәғлүмәт интернет-порталында баҫылған.
Документҡа ярашлы, хәҙер республиканың көньяҡ биләмәһендә – Әбйәлил, Әлшәй, Ауырғазы, Баймаҡ, Баҡалы, Бәләбәй, Бишбүләк, Благовар, Бүздәк, Дәүләкән, Йәрмәкәй, Ейәнсура, Күгәрсен, Кушнаренко, Көйөргәҙе, Мәләүез, Миәкә, Стәрлебаш, Стәрлетамаҡ, Туймазы, Федоровка, Хәйбулла, Шишмә һәм Шаран райондарында ҡоштарға яҙғы һунар апрелдең икенсе шәмбеһенән ун көнгә рөхсәт ителә.
Апрелдең өсөнсө шәмбеһенән иһә республиканың төньяҡ биләмәһендә – Архангел, Асҡын, Балтас, Балаҡатай, Белорет, Бөрө, Благовещен, Борай, Бөрйән, Ғафури, Дыуан, Дүртөйлө, Йылайыр, Иглин, Илеш, Ишембай, Ҡалтасы, Ҡариҙел, Ҡырмыҫҡалы, Ҡыйғы, Краснокама, Мәсетле, Мишкә, Нуриман, Салауат, Тәтешле, Учалы, Саҡмағош һәм Яңауыл райондарында.
Һәр кем һунар итеү мөмкинлегенә эйә булған һунар биләмәләрендә ҡыр сусҡа-һына һәүәҫкәр һәм спорт һунары ваҡыты – 1 августан 29 февралгә, ә ҡуянға 1 октябрҙән 31 ғинуарға тиклем сикләнәсәк.