Мәсетле тормошо
+19 °С
Болотло
Бөтә яңылыҡтар
Милли проекттар
18 Февраль 2021, 15:30

Донъя әкиәттәрен башҡортса тыңларға мөмкин

Республиканың Милли китапханаһы сайтында донъя классикаһы һаналған әкиәттәрҙе башҡорт телендә тыңлау мөмкинлеге барлыҡҡа килде.

Был аудиокитаптарҙа Л. Кэрроллдың “Әлисәнең Сәйерстандағы мажаралары” һәм “Мең дә бер кисә” көнсығыш әкиәттәре геройҙары саф башҡорт телендә “һөйләшә”.
Проект республиканың Мәҙәниәт министрлығы тарафынан тормошҡа ашырылған, ә аудиояҙмаларҙы яҙҙырыу буйынса Илшат Фәрхетдинов етәкселегендәге ижади төркөм ең һыҙғанып эшләгән.
- Мин 11 йыл дауамында балаларға президент шыршыһы байрамын үткәреүҙе ойоштороу менән шөғөлләндем. Шул ваҡытта уҡ аудиоәкиәттәр яҙҙырыу тураһында хыялым бар ине. Мәҙәниәт министрлығы һайлап алыу өсөн бер нисә әкиәт тәҡдим итте һәм шулай итеп эш башланды. Әкиәттәрҙе Фирғәт Ғарипов, Фирҙәт Ғәлиев, Фәрхәт Ғәйнетдинов һәм Зилә Ситдиҡова уҡыны. Бөгөн Киплингтың “Маугли”һын эшләйбеҙ. Март аҙағына тиклем Роберт Стивенсондың “Хазиналар утрауы”н тамамларға уйлайбыҙ. Киләсәктә халыҡ әкиәттәренең дә аудикитаптарын булдырыуға тотонорбоҙ, - тип эш барышы хаҡында һөйләне төркөм етәксеһе, “Башҡортостан” дәүләт концерт залының баш режиссеры Илшат Фәхретдинов.
Уҡыусылар, әкиәт яратыусылар бөгөндән үк Милли китапхананың сайтына инеп, түбәндәге әкиәттәрҙе тыңлай ала: “Әлисәнең Сәйерстандағы мажаралары”, “Мең дә бер кисә” (ул Шәһризаданың һигеҙ әкиәтенән тора: “Әкиәт былай башлана”, “Үгеҙ менән ишәк тураһында хикәйәт”, “Аладдин менән тылсымлы шәм”, “Али Баба менән ҡырҡ юлбаҫар”, “Балыҡсы тураһында әкиәт”, “Тылсымлы ат тураһында әкиәт”, “Һыңар күҙле батша тураһында әкиәт”, “Сәйәхәтсе Синбад”.
Уларҙы тыңлау өсөн түбәндәге һылтанмалар аша инергә кәрәк: http://ebook.bashnl.ru/dsweb/View/ResourceCollection-5151
Фото: b17.ru
Автор: Гөлдәр Яҡшығолова