Асия Сәфәрова – акция еңеүсеһе

Асия Фәйез ҡыҙы оҙаҡ йылдар Әжекәй мәктәбендә математика уҡытыусыһы булып эшләгән. Ул – Башҡортостан Республикаһының мәғариф алдынғыһы, “Рәсәй дөйөм белем биреү мәктәптәренең иң яҡшы уҡытыусыһы” конкурсының 2008 йылғы еңеүсеһе.
Хөрмәтле педагог уҡытыусы һөнәрендә генә түгел, спортта ла юғары һөҙөмтәләргә өлгәшкән. Ул – саңғы буйынса спорт мастерлығына кандидат.
Тормош иптәше Рифат Ғәзизйән улы менән ике бала тәрбиәләп үҫтергәндәр, уларҙың һәр береһенә лайыҡлы белем алырға ярҙам иткәндәр. Улы Азат “Команда тактик ғәскәр разведкаһы” белгеслеге буйынса Новосибирск юғары дөйөм ғәскәр команда училищеһын тамамлаған. Ҡыҙы Розалия Башҡорт дәүләт медицина университетында белем алған.
Әле Асия Фәйез ҡыҙы хаҡлы ялда һәм яңылыҡтар хаҡында хәбәрҙар булыу өсөн район гәзитен алдырыуын дауам итә.
– “Мәсетле тормошо” гәзитен ныҡ яратам. Унда кешеләр һәм ғаиләләр тураһында күп мәҡәләләр тупланған. Шулай уҡ миңә файҙалы кәңәштәр оҡшай, уларҙың күбеһен файҙаланам. Редакция хеҙмәткәрҙәренә эштәренең уң барыуын, ә ил халҡына махсус хәрби операция тиҙерәк тамамланыуын һәм егеттәребеҙҙең еңеү яулап, иҫән-һау әйләнеп ҡайтыуҙарын теләйем. Донъяла тыныслыҡ булһын, – ти ихлас күңелдән Асия Сәфәрова.
Бүләк отҡан тоғро гәзит уҡыусыбыҙҙы ихлас күңелдән ҡотлайбыҙ! Бүләктәр әле бар һәм улар үҙ хужаларын көтә.

2 декабрҙән 12-һенә тиклем матбуғатҡа яҙылыу ун көнлөгө уҙа. Ошо осорҙа Рәсәй почтаһы аша “Мәсетле тормошо” гәзитенә ташламалы хаҡ менән яҙылырға мөмкин.