Өфөлә Рәмил Килмәмәтовтың Башҡортостан тураһында фотокүргәҙмәһе асыла

Ойоштороусылар хәбәр итеүенсә, проект Рәсәйҙең танылған фоторәссамы һәм мәҙәниәт эшмәкәре Рәмил Килмәмәтовтың(1949-2019) тыуған төйәгенә  – Башҡортостанына бағышланған һайланма эштәре коллекцияһы менән таныштыра.

Рәмил Килмәмәтов – илебеҙҙең художество фотографияһының иң яҡшы классик традицияларын һаҡлаусы. Уның барлыҡ фотоһүрәттәренә Тыуған ил тойғоһо, тормош гармонияһы, ихласлыҡ һәм эскерһеҙлек, оптимизм хас. «Рәмил Килмәмәтов. Башҡортостан хаҡында һөйөү менән» күргәҙмәһе – һәр кемде йәнә бер тапҡыр күп сәйәхәт иткән, дуҫлыҡтың ҡәҙерен белгән һәм тормошто сикһеҙ яратҡан шәхестең матур фоторәсемдәре донъяһына саҡыра.

Рәмил Исмәғил улының бик күп наградалары һәм исемдәре бар, ул ил кимәлендәге, шулай уҡ халыҡ-ара саралар һәм форумдар ойоштороусы, иҫәпһеҙ-һанһыҙ шәхси күргәҙмәләр геройы булды. Уникаль проект – фоторәссамдарҙың «Башҡортостан. Тәбиғәт. Кеше. Мәҙәниәт» халыҡ-ара акцияһы 28 йылдан ашыу ғәмәлгә ашырылып килде. Унда Рәсәй, Бойондороҡһоҙ Дәүләттәр Берләшмәһе, ШОС һәм БРИКС илдәре, ТӨРКСОЙ, Европа һәм Америка ҡитғаһының иң яҡшы фотографтары ҡатнашты. Һәр ваҡыт акцияла ҡатнашҡан илдәрҙә «Традицияларҙы һаҡлаған  ер» һәм «Башҡортостан дуҫтар күҙлегенән» фотокүргәҙмәләре ойошторолдо. Бынан тыш, фотоальбомдар донъя күрҙе. Улар донъяны республикабыҙ, бәрәкәтле Башҡортостан ерендә йәшәгән халыҡтарҙың мәҙәниәте һәм ғөрөф-ғәҙәттәре менән таныштыра.

Күргәҙмә көндөҙгө сәғәт 3-тә асыла.

6+