Миңлеғәфүр Зәйнетдиновты ижади кисәһендә ҡотларға яҡташтары, ауылдаштары, коллегалары, туғандары һәм дуҫтары йыйылды.
Юбиляр адресына бик күп йылы һүҙҙәр яңғыраны. Мәсетле районы хакимиәте башлығының социаль мәсьәләләр буйынса урынбаҫары Гөлназ Ҡадирова: “Районда Миңлеғәфүр Зәйнетдинов менән ғорурланалар, хөрмәтләйҙәр һәм ижадына һоҡланалар”, – тип белдерҙе. Салауат районы хакимиәте башлығы урынбаҫары Марат Ғилманов та юбиляр менән бергә эшләү тәьҫораттары менән уртаҡлашты. Ауыл биләмәләре хакимиәттәре башлыҡтары ҡотлау һүҙҙәрен еткерҙе.
Миңлеғәфүр Миңлеәхмәт улы яҡташы, илһамландырған уҡытыусыһы – донъя кимәлендәге виртуоз ҡумыҙсы, Салауат Юлаев исемендәге дәүләт премияһы лауреаты Роберт Заһретдинов хаҡында хәтирәләре менән уртаҡлашты.
Музыкант үҙе Миңлеғәфүр Зәйнетдинов исемендәге кубокка Халыҡ-ара онлайн ҡумыҙҙа уйнаусылар видеоконкурсының “Яңғыҙ башҡарыу. Балалар” номинацияһында I дәрәжә лауреаты Ильвир Мәғәфүровҡа, II дәрәжә лауреаты Алтынай Ғәлимоваға һәм конкурста ҡатнашыусы Илгизә Лоҡмановаға приздар тап- шырҙы.
Шулай уҡ кисәлә “Әй ауазы” район ҡумыҙсылары конкурсына йомғаҡ яһалды. Өлкәндәр төркөмөндә беренсе урынға “Мираҫ” ансамбле лайыҡ булды (Һөләймән ауылы, етәксеһе – Әлфинә Зәйнетдинова), 16 йәштән өлкән яңғыҙ башҡарыусылар араһында – Илгизә Лоҡманова (Ләмәҙтамаҡ ауылы), 16 йәшкә тиклемге яңғыҙ башҡарыусыларҙан – Ильвир Мәғәфүров (Әжекәй ауылы).
Өлкән төркөмдә икенсе урынға “Һоя” ансамбле сыҡты (Теләш ауылы, Ринат Тәҡиуллин), балалар төркөмө араһында – “Сулпылар” ансамбле (Йонос ауылы, Зифа Сәлмәнова), 16 йәштән өлкән башҡарыусылар араһында – Айсыуаҡ Ханнанов (Бурансы ауылы) һәм Инсаф Вәлиев (Туҡбай ауылы), 16 йәшкә тиклем – Алһыу Сафина (Тәкә ауылы) һәм Алтынай Ғәлимова (Ишәле ауылы).
Өлкән төркөмдә өсөнсө урынға “Ҡошсолар” (Ләмәҙтамаҡ ауылы, Илгизә Лоҡманова) һәм “Байрам” (Дыуан-Мәсетле ауылы, Данис Ғәлимов) ансамблдәре лайыҡ булды, балалар төркөмө араһында – “Ауаз” ансамбле (Яңы Яуыш ауылы, Денис Нәбиуллин), 16 йәштән өлкән башҡарыусылар араһында – Данил Ғилмийәров (Ғүмәр ауылы) һәм Ридан Зәйнетдинов (Һөләймән ауылы), 16 йәшкә тиклем – Фир-ҙәүес Мөхәмәтова (Дыуан-Мәсетле ауылы) һәм Гөлгизә Иштуғанова (Йыланыш ауылы).
Һүрәттә: Жюри ағзаһы Энгельс Ғәлиәкбәров (һулда) һәм “Әй ауазы” район конкурсының I дәрәжә дипломы менән билдәләнеүселәр: Әлфинә Зәйнетдинова, Ильвир Мәғәфүров, Илгизә Лоҡманова.