БАГСУ-ла асыҡ ишектәр көнө үтәсәк

Был көндө абитуриенттар, уларҙың ата-әсәләре һәм теләгән һәр кем Башҡортостан дәүләт хеҙмәте һәм идара итеү академияһының белем биреү программалары менән таныша, белем алыу һәм һөнәри үҫеш мөмкинлектәре тураһында белә ала.

 – Асыҡ ишектәр көнө – ул академиябыҙҙы эстән күреү, уҡытыусылар, студенттар менән танышыу һәм юриспруденция, дәүләт һәм муниципаль идара итеү өлкәһендә белем биреү мөхитен тойоу мөмкинлеге. Нисек уҡырға инеүҙәре, уҡыу һәм практика тәжрибәһе менән уртаҡлашасаҡ амбассадор студенттарҙың ҡатнашыуы сараның мөһим өлөшө буласаҡ. Интерактив форматтар һәм экскурсиялар буласаҡ абитуриенттарға Башҡортостан дәүләт хеҙмәте һәм идара итеү академияһында уҡыуҙың ниндәй перспективалар асыуын яҡшыраҡ аңларға ярҙам итәсәк, — тип билдәләне Академия ректоры вазифаһын башҡарыусы А.Ш. Бадранов.

Башҡортостан дәүләт хеҙмәте һәм идара итеү академияһының матбуғат хеҙмәте мәғлүмәте буйынса, асыҡ ишектәр көнө алдынан кураторҙар етәкселегендәге студент-амбассадорҙар командаһы мәктәптәрҙә һөнәри йүнәлеш буйынса осрашыуҙар үткәрә. Балаларға әҙерлек йүнәлештәре, эшкә урынлашыу мөмкинлектәре һәм студенттарға ярҙам саралары тураһында һөйләйҙәр.

Сара ҡунаҡтарына һөнәри йүнәлеш буйынса тест үтергә, Академия етәкселеге менән осрашыуға барырға, идара итеү алыштарында һәм интерактив квизда ҡатнашырға тәҡдим ителә. Төп ваҡиғаларҙың береһе — Башҡортостан Дәүләт Йыйылышы – Ҡоролтай Йортона экскурсия, унда ҡатнашыусылар төбәкте үҫтереү өсөн мөһим ҡарарҙар формалаштырыу процесын күрәсәк.

Бынан тыш, уҡыусылар уҡытыусыларға һәм студенттарға һорауҙар бирә, уҡыу инфраструктураһы, заманса белем биреү технологиялары менән таныша һәм уҡырға инеү буйынса шәхси консультациялар ала аласаҡ.

Академия бөгөн: 18 юғары белем биреү программаһы; 15 000 юғары белем биреү программаларын тамамлаусылар; 150 өҫтәмә һөнәри белем биреү программаһы; 5 000 өҫтәмә белем биреү программаларын тыңлаусылар.

Сара Академияның төп корпусында үтә. Адресы: Өфө ҡалаһы, Зәки Вәлиди урамы, 40-сы йорт.

Асыҡ ишектәр көнө буласаҡ абитуриенттарға һөнәр һайларға һәм Башҡортостан дәүләт хеҙмәте һәм идара итеү академияһының мөмкинлектәре менән яҡынданыраҡ танышырға ярҙам итәсәк.

Фото: Уҡыу йортоноң матбуғат хеҙмәте.

6+

Источник: https://bashgazet.ru/articles/belem-m-t-rbi/2025-11-27/bagsu-la-asy-ishekt-r-k-n-t-s-k-4484293