Кемдәр улар “Бала саҡ навигаторҙары”?

“Бала саҡ навигаторҙары” Федераль проектын РФ Мәғариф министрлығы “Мәғариф” милли проекты нигеҙендә тормошҡа ашыра. Уның төп маҡсаты – белем биреү ойошмаларында тәрбиә өлкәһендә эшләү өсөн яңы төр белгестәр әҙерләү.
Кәңәшселәр – “Балалыҡ навигаторҙары 2.0” Бөтә Рәсәй конкурсы еңеүселәре. Тәрбиәүи эш буйынса программаларҙы тормошҡа ашырыу, балаларҙа социаль башланғыстарҙы үҫтереү, уҡыусыларҙың һөнәри үҙбилдәләнешендә булышлыҡ итеү – уларҙың төп бурысы.
Мәғарифҡа ыңғай мөнәсәбәт һәм әүҙем гражданлыҡ ҡарашы булдырыу маҡсатында кәңәшселәр 2023 – 2024 уҡыу йылы дауамында 80-дән ашыу сара, акция, берҙәм эш көнө үткәрҙе. Улар ярҙамында мәктәптәрҙә кесе йәштәге уҡыусыларҙың социаль мөһим сифаттарын һәм ҡиммәттәрен үҫтереүгә йүнәлтелгән “Орлята России” дәрестән тыш эшмәкәрлек программаһы тормошҡа ашырыла.
Уҡыу йылы дауамында директорҙың тәрбиә буйынса кәңәшселәре дөйөм мәктәп ата-әсәләр йыйылыштарында, район сараларында, төрлө конкурстарҙа, форумдарҙа һәм төбәк кимәлендәге семинарҙарҙа ҡатнашты.
Кәңәшселәр ата-әсәләр менән дә эшләй: дөйөм мәктәп чатын алып бара, теләктәрҙе иҫәпкә ала, ғаиләләрҙе мәктәп тормошона йәлеп итә.
Яңыраҡ “Ҙур ғаилә уйындары” республика конкурсы иғлан ителде. Шуға бәйле “Бала саҡ навигаторҙары” командаһы ата-әсәләрҙе август аҙағына тиклем мәктәп этабына ҡушылырға саҡыра. Еңеүселәрҙе ойоштороусыларҙан һәм бағыусыларҙан бүләктәр, шулай уҡ муниципаль һәм республика кимәлендә еңеү өсөн көрәшеү мөмкинлеге көтә.
Барлыҡ саралар буйынса отчеттар “Бәйләнештә” социаль селтәрендәге район мәктәптәре һәм “Мәсетле районы бала саҡ навигаторҙары” төркөмөндә баҫыла.
Кәңәшсе балалар һәм уҡытыусылар менән бергә проекттар ижад итә һәм эшләй, ойоштороусы, илһамландырыусы, остаз булып тора. Бынан тыш, ул – Рәсәй йәмғиәтенең рухи-әхлаҡи ҡиммәттәренә нигеҙләнгән тәрбиә биреүҙең яңы фәлсәфәһе күҙлегенән ҡарағанда, балалыҡ донъяһын тәүге асыусы.