Йырлы-моңло ҡунаҡханала осрашыу

Сәнғәт төрҙәренең кешенең хис-тойғоларына иң йоғонто яһағаны – йыр-моң. Музыка – тылсымлы көс, шатлыҡ һәм илһам сығанағы. Нәҡ ул беҙҙең тормошто сағыу төҫтәр менән тулыландыра. Йыр сәнғәтенә ҡағылғандар ысын тойғолар кисерә.

Балалар баҡсаһында музыка буйынса тәрбиә биреүҙең төп бурысын билдәләгәндә, тәү сиратта ул – балаларҙы яҡшы музыкаға ғашиҡ итеү. Баланы музыкаға өйрәткәндә ата-әсәләрҙең ҡатнашлығы мөһим.

“Ромашка” балалар баҡсаһында “Йырлы-моңло ҡунаҡханала осрашыу” музыкаль сараһы үтте. Уны балалар баҡсаһының музыка етәксеһе Рәлиә Шәйәхмәтова ойошторҙо. Иркен залда балаларҙы музыкаға ылыҡтырырлыҡ атмосфера булдырылғайны, композиторҙарҙың портреттары күргәҙмәһе ойошторолдо. Сара өлкән төркөм балаларының ата-әсәләре менән бәйгеһе формаһында үтте. Ярыш төрҙәре араһында балалар музыка тураһында шиғырҙар һөйләне, таныш йырҙарҙы башҡарҙы, бейене. Ата-әсәләре лә балаларынан ҡалышманы, сабыйҙары өсөн яңы яҡтан асылдылар: вальс бейенеләр, музыка ҡоралдарында оркестрҙа бик оҫта уйнанылар. Ә ата-әсәләрҙе балаларының классик музыканы, композиторҙарҙы, йырҙарҙы яҡшы белеүҙәре хайран ҡалдырҙы.

Музыкаль бәйгелә ҙур булмаған айырма менән кескәйҙәр еңде. Еңеүселәргә скрипка асҡысы формаһында миҙалдар һәм татлы бүләктәр тапшырылды. Был осрашыуҙан ата-әсәләр ҙә, кескәйҙәр ҙә бик ҡәнәғәт ҡалды.

Ирина АНТИПИНА,

Оло Ыҡтамаҡ ауылы “Ромашка” балалар баҡсаһының өлкән тәрбиәсеһе.