Мал аҙығы әҙерләүгә төштөләр

Районда мал аҙығы әҙерләүгә тәүгеләрҙән булып “Попов В. В.” крәҫтиән (фермер) хужалығы механизаторҙары төштө. Һәүкәштәргә яҡшы ҡышлау өсөн бында 500 тонна бесән, 400 тонна самаһы сенаж һалырға уйлайҙар.

– Үлән, былтырғыға ҡарағанда, һыйығыраҡ, – тип һөйләй хужалыҡ башлығы Владимир Васильевич. – Мал аҙығы әҙерләү кампанияһы 20 июндә башланды, 20 тонна урап өлгөрҙөк. Әммә һауа торошо артабан эшләргә бирмәй.

Хужалыҡта күп йыллыҡ үләндәр- ҙе 200 гектарҙан сабып алырға кә- рәк. Бесән эшендә Николай Сидоров, Радис Хөпөтдинов, Руслан Мөхәмәтуллин, Сергей Власов эшләй.

Николай Иванович Сидоровтың бар хеҙмәт юлы ауыл хужалығы менән бәйләнгән. 22 йыл ул “Серп и молот” колхозында эшләгән, һуңғы 6 йылда – ошо хужалыҡта. Намыҫлы хеҙмәте өсөн лайыҡлы наградаларын да алған. Уларҙың береһе – Баш-ҡортостан Республикаһы Ауыл хужалығы министрлығының почет грамотаһы.

– һауа торошо матур булып, техника боҙолоп китмәһә, көнөнә 120 рулон бесән урайым, – ти Николай Иванович.

Район буйынса бөтәһе 24 мең тоннанан ашыу сенаж һәм 17 тонна бесән әҙерләргә кәрәк.