-6 °С
Болотло
Бөтә яңылыҡтар
ХАТТАРҘАН
19 Март 2018, 16:22
21 март – Халыҡ-ара поэзия көнө
Ғаилә
Ғаилә – тик хис-һөйөүҙең
Ояһы!
Йөҙ хоҡуҡҡа мең гаранттар
Ҡуяһы!
Ирекле лә, ҡәтғи ҙә күп
Бурыстар –
Ғаиләне терәп тотҡан
Ҡоростар.
Ғаилә – ул кооператив,
Милек тә,
Тартҡылашҡан өйҙә юҡ ул
Ирек тә.
Ғаилә – ул күсәгилеш
Тыуымдар.
Ырыу йолон, ата юлын
Ҡыуымдар.
Ғаилә – ул бер-береңә
Ял биреү.
Изге эшкә, юл ярышып,
Ал биреү.
Ғаилә – ул көс туплаусы
Нур-йомғаҡ;
Туғаҙаҡ ир – далалағы
Ел-ҡамғаҡ.
Өйлө – көйлө, иртән торһа,
Таң кеүек.
Яңғыҙ?... – Ҡайҙа ҡуна белмәҫ
Саң кеүек.
Бергә тапҡан ишләнә лә
Ҡушлана.
Яңғыҙ тапҡан йөҙ тарафҡа
Ҡошлана.
Ҡаты-ҡото сит туйҙа ла
Ҡабыла.
Хис-һөйөү ни урамда ла
Табыла.
Мөхәббәт ни ғаиләгә
Бер биҙәк,
Тик башҡа яҡ онотолһа,
Ҡар, тиҙәк!
Йәшәү – эш ул, эш өсөн ял –
Ғаилә.
Илдә ир – Мәжнүн, ғаилә –
Ләйлә.
(1991 й.).
Рәшит ӘХТӘРИ.
Шатлана күңелдәр
(йыр)
Елдәр елберләп иҫәләр,
Үләндәрҙе һелкетәләр.
Таң йондоҙҙары балҡыйҙар,
Нурлы булыр иртәләр!
Ҡушымта:
Һандуғаслы яҙ килгәнгә,
Йылмайып ҡояш көлгәнгә,
Бик шатлана күңелдәр,
Үтһәләр ҙә ғүмерҙәр.
Шишмәләрҙең ағышын
Ҡоштар бит көйгә һала.
Үтә генә ғүмерҙәр,
Һыуҙарҙай аға-аға…
Ҡушымта.
Тыуған яҡ гүзәллеге
Нурлы хистәр уйлата.
Әйтерһең дә күңелдә
Матур йырҙар йырлата.
Ҡушымта.
Азеф МӘҒРҮПОВ.
Абдулла ауылы.
Бүре күҙҙәре
Күрҙем яҡын бүре күҙҙәрен,
Сағылдырыр микән һүҙҙәрем.
Ҡарашында тойҙом күпме хис:
Тәрән һағыш, ғазап, тотҡон үс.
Янды күҙҙәр берсә ут булып,
Берсә һүнде, осҡон юҡ булып.
Алға – артҡа… Ирек – өс аҙым –
Тар ситлектә бүре туланы.
Өҙгөләнеп, ауыр уйҙарҙан,
Ҡабат-ҡабат килеп ураным.
Биктәр
Бөгөн тағы йорттан ҡыуҙың уны –
Үҙ өйөнән, бергә төҙөгән.
Ҡайҙа барыр, кемгә һыйыныр ул
Ғүмеренең һалҡын көҙөндә?
Осор ине лә бит сикһеҙ күккә,
Ҡанатлы ла зарлы ҡош түгел.
Йөҙөр ине йылғыр балыҡ булһа,
Төйәк итеп ерҙең ҙур күлен.
Айнының да аҡылыңа килдең,
Тәүбә итеп ғәфү үтендең.
Һиҙмәйһеңдер, бикләнгәнен һиңә
Ишектәре күңел-йортоноң.
Гөлсирә Шафиҡова.
Йонос ауылы.
Сабырлыҡ
Тормош һуҡмағынан атлай торғас,
Сабырлыҡтар һына ҡай ваҡыт.
Ауырлыҡҡа түҙәр микән ти(е)п,
Беҙҙе Хоҙай һынай һәр ваҡыт.
Сабыр ҡанаттарын ҡаға-һуға
Фәрештәләр беҙҙе һаҡлаһын.
Тормош һуҡмаҡтарын үткән саҡта
Сабыр ҡанаттары һынмаһын.
Сабыр төбө һары алтын, тиҙәр,
Ҡайғы түгел микән төптәре,
Ҡайғыларға сыҙай, ә шатлыҡҡа
Түҙәр микән әҙәм йөрәге.
Рида ЗӘЙНЕТДИНОВА.
Һөләймән ауылы.
Колхоз бөткәс…
Колхоз бөткәс аптырап та ҡалдым
Нисек тамаҡ туйҙырырбыҙ тип,
Баҡтиһәң, ул, Хоҙай бар икән шул.
Аҙыҡ табыусыларҙы бар итте.
Юҡтан бар итеүсе алтын баштар–
Йәнәш эшләп йөрөгән кешеләр.
Совет заманында ирек бирмәй,
Ундайҙарҙың юлын киҫкәндәр.
Бына хәҙер бөтә иркенлектәр алып,
Беҙҙең халыҡ дәррәү тотондо,
Үҙ халҡының мохтажлығын аңлап,
Туйындырырға тип, ихлас тотондо.
Йәлләмәне көсөн, белемен, ваҡытын,
Төндәр буйы план төҙөнө.
Баштан-аяҡ оло эшкә сумып,
Еткән 50 йәшен дә ул һиҙмәне.
Бөткән колхозды һин алмаштырҙың,
Халыҡтарың өмөт бағлайҙар.
Родион һәр саҡ иҫән булһын ти(е)п,
Һиңә оло бәхет, һаулыҡ юрайҙар.
(2012 й.).
Раян ҒӘЙНЕТДИНОВ.
Дыуан-Мәсетле ауылы.
Агентство по печати и средствам массовой информации Республики Башкортостан.
Баш мөхәррир Э. Ф. БАҺАУЕТДИНОВА
Телефон
8(34770)2-00-05; 8(34770)2-00-32.
Электрон почта