Хөрмәтле уҡытыусының яҡты иҫтәлегенә

Ул 1956 йылдың 6 ноябрендә Оло Ыҡтамаҡ ауылында эшселәр ғаиләһендә тыуған. Атаһы Иван Прокопьевич – тимерсе, әсәһе Анна Михайловна йыйыштырыусы булып эшләгән. Нина Ивановна интеллигент, юғары мәҙәниәтле һәм белемле булыуы менән айырылып торҙо. Ире Андрей Рәмил улы менән ҡыҙҙары Екатерина һәм улдары Юрийҙы тәрбиәләп үҫтерҙеләр.
Нина Ивановнаның хеҙмәт юлы 1978 йылда, Свердловск педагогия институтын тамамлағандан һуң, Беренсе май ҡасабаһындағы ауыл мәктәбендә башлана. Һуңынан йәш педагог Кесе Ыҡтамаҡ мәктәбендә, 2-се Оло Ыҡтамаҡ мәктәбендә эшләй, ә 2000 йылдан лицейҙа уҡыта.
Нина Ивановнаны барыһы ла бик белемле, эрудициялы һәм ижади кеше булараҡ хәтерләй. Ул рус теле һәм әҙәбиәтен уҡытыу методикаһын яҡшы белде, күп уҡыны, шиғырҙарҙы яттан һөйләне. Уҡыусылары төрлө олимпиадаларҙа уңышлы ҡатнашты, дәүләт йомғаҡлау аттестацияһын тапшырғанда юғары һөҙөмтәләр күрһәтте.
– Нина Ивановна менән пенсияға сыҡҡансы оҙаҡ йылдар бергә эшләнек. Ул яҡшы уҡытыусы, принципиаль, намыҫлы, аҡыллы ине. Уҡыусылар, ата-әсәләр менән яҡшы мөғәмәлә итте, уҡытыусылар менән яҡшы мөнәсәбәттә булды. Беҙ уны намыҫлы, ярҙамсыл, изге күңелле булғаны өсөн хөрмәт иттек. Ул балаларын, ейәнсәрҙәрен яратты, Андрей Рәмил улы өсөн хәстәрлекле ҡатын булды. Уның шулай иртә китеүе бик ҡыҙғаныс, – тип хәтерләй педагогик хеҙмәт ветераны Гөлсәсәк Сафина.
– Нина Ивановна эшен теүәл башҡарған, тәртипле һәм шул уҡ ваҡытта ижади кеше булды, бер ҡасан да бер кемде лә ғәйепләмәне. Ул һәр дәрескә ентекле әҙерләнде. Бик белемле ине, – ти педагогик хеҙмәт ветераны Дамира Фәйзраева.
– Нина Ивановнаның минең менән бергә “Йыл уҡытыусыһы” республика конкурсына ярҙам төркөмөндә барыуы ныҡ хәтеремдә ҡалған. Ул аҡыллы кәңәштәр бирҙе, идеялар менән тулы булды, рухи яҡтан ярҙам итте, барыһын да илһамландырҙы. Бик изге күңелле кеше һәм үҙ эшенең оҫтаһы ине, – тип йылы һүҙҙәр менән иҫкә ала уны уҡытыусы Ольга Дәүләтшина.
Әмирова Нина Ивановна тураһында яҡты иҫтәлек коллегаларының һәм уны белгәндәрҙең йөрәктәрендә оҙаҡ һаҡланыр.
Лицей коллективы, педагогик хеҙмәт ветерандары.