Мәңге тере, мәңге йәш!

Бөгөн культҡа әйләнгән билдәле рок-йырсы, “Кино” төркөмө лидеры Виктор Цойҙың хәтер көнө. Бынан тап 29 йыл элек, 1990 йылдың 15 авгусында Виктор Цой 28 генә йәшендә фажиғәле һәләк булған.

Рәсми версия буйынса йырсы "Слока-Талси" трассаһының 35-се километрында аварияға осраған: ул үҙенең "Москвич-2141" автомобиленең руль артында йоҡлап киткән һәм "Икарус" автобусына барып бәрелгән.

Милиция протоколында фажиғә ваҡыты 12 сәғәт 28 минут тип теркәлгән. Автомобилдең тиҙлеге сәғәтенә 130 километр булған, “Москвич” водителе шунда уҡ йән биргән, автобустыҡына иһә бер нәмә лә булмаған, тигән яҙыуҙар ҙа һаҡланған. Тикшереүҙәр Виктор Цойҙың айныҡ булғанлығын, тик артыҡ йонсоуҙан, рулдә йоҡлап китеүен күрһәткән.

Рок-йырсыны 19 августа Ленинград ҡалаһында ерләгәндәр.

Автор: Г. САЛАУАТОВА.