Алимент түләмәү эҙемтәһеҙ үтмәй

Балиғ булмаған балаларын ҡарауға суд ҡарарын боҙған һәм башҡарыу производствоһы ҡуҙғатылған көндән алып ике ай һәм унан күберәк ваҡыт эсендә етди сәбәпһеҙ алимент түләмәгән бурыслыларға ҡарата Рәсәй Федераль суд приставтары хеҙмәтенең Башҡортостан Республикаһы буйынса идаралығы Мәсетле районы бүлеге ошо йылдың уҙған осоронда 7 административ протокол төҙөгән, улар суд тарафынан ҡаралған, 5 енәйәт эше ҡуҙғатылған.

РФ Ғаилә кодексының 80-се статьяһына ярашлы, ата-әсәләр балиғ булмаған йәштәге балаларын ҡарарға бурыслы. Балиғ булмаған балаларын ҡарау тәртибен һәм формаһын ата-әсәләр үҙ аллы билдәләй.

РФ Ғаилә кодексының 16-сы бүлегенә ярашлы, ата-әсәләр балиғ булмаған балаларын ҡарау (алимент түләү) тураһында килешеү төҙөргә хоҡуҡлы. Әгәр атай йәки әсәй балиғ булмаған балаһын ҡарауҙы тәьмин итмәһә, унан аҡса (алимент) суд тәртибендә түләтелә.

Алимент түләмәгән өсөн өс төрлө яуаплылыҡ ҡаралған.

Гражданлыҡ яуаплылығы.

Был яуаплылыҡ төрө буйынса алимент түләүсенең ғәйебе менән алимент түләүҙе кисектергән өсөн неустойка ҡаралған. Неустойка күләме кисектергән һәр көн өсөн түләнмәгән алимент суммаһынан икенән бер процент тәшкил итә. Гражданлыҡ яуаплылығын ҡулланыуға ирешеү өсөн уны түләтергә теләгән кеше бурысты һәм неустойканы түләтеү тураһында талап менән дәғүә ғаризаһы яҙып судҡа мөрәжәғәт итергә тейеш.

Административ яуаплылыҡ.

Алимент түләмәгән өсөн штраф, банктағы иҫәпкә, милеккә арест һалыу, ил территорияһында күсеп йөрөүҙе йәки сит илгә сығыуҙы сикләү, автотранспорт менән идара итеүгә хоҡуҡтан мәхрүм итеү, ата-әсәлек хоҡуғынан мәхрүм итеү кеүек язалар ҡарала.

Енәйәт яуаплылығы.

Был төр яуаплылыҡ енәйәт составы булғанда –суд ҡарарын йәки нотариус аша төҙөлгән килешеүҙе боҙоп, етди сәбәпһеҙ балиғ булмаған балаларын, 18 йәше тулған эшкә һәләтһеҙ балаларын ҡарауға аҡса түләүҙе бер нисә тапҡыр боҙғанда ҡулланыла (РФ Енәйәт кодексының 157-се статьяһының 1-се бүлеге).

Был енәйәт өсөн түбәндә һаналып үткән яза төрҙәре ҡаралған:

- бер йылға тиклем холоҡ төҙәтеү эштәре;

- бер йылға тиклем мәжбүри эштәр;

- ике айға тиклем ҡулға алыу;

- бер йылға тиклем иректән мәхрүм итеү.

Адис ХӘЙРЕТДИНОВ,

суд приставтары хеҙмәтенең Мәсетле районы бүлеге начальнигы урынбаҫары – өлкән суд приставы урынбаҫары.

Новости партнеров

1 ғинуарҙа саҡ үлемдән ҡалған

На уровне молекул

“Ана капиталы” акчасы калган иде