Сит ил паспорты алам тиһәң

“Беҙҙең бүлексә интернет аша 5 йыл ғәмәлдә буласаҡ иҫке өлгөләге сит ил паспорты әҙерләүгә ғаризалар ҡабул итә. Ғаризаны электрон формала ебәреү өсөн гражданға башта www.gosuslugi.ru адресы буйынса Рәсәй Федерацияһы Хөкүмәтенең Берҙәм дәүләт һәм муниципаль хеҙмәттәр порталында шәхси кабинетта теркәлергә кәрәк. Унда үҙегеҙҙең персональ мәғлүмәттәрегеҙҙе: фамилия, исем-шәрифегеҙҙе, өй адресын, кеҫә телефоны һандарын, электрон почта адресын, ИНН, СНИЛС һәм башҡа мәғлүмәттәрҙе күрһәтергә. Шулай итеп, һеҙ шәхси кабинетта тәүге теркәлеүҙе үтәһегеҙ.

Пароль менән файҙаланып, шәхси кабинетҡа инегеҙ, сит ил паспорты әҙерләүгә һылтанма буйынса күсегеҙ, ғаризаның бар пункттарын иғтибарлап тултырығыҙ, унда билдәләнгән талаптар буйынса фотоғыҙҙы ҡуйығыҙ.

Шәхси кабинет аша ғаризаның артабан ҡаралыуын тикшереп бара алаһығыҙ. Мәҫәлән, “Ҡабул ителде” статусы ғаризағыҙҙың дөрөҫ тултырылыуын аңлата, “Кире ҡайтарыу” статусы анкетала хата булыуын күрһәтә. Был хәбәрҙе һеҙ ғариза биргән мәлдән алып бер тәүлек эсендә аласаҡһығыҙ. Ғариза ҡабул ител-һә, мәғлүмәттәрҙе раҫлаусы документтарҙың төп нөсхәләрен һәм дәүләт пошлинаһы түләү тураһында квитанцияны алып ҡасан һәм ҡайһы кабинетҡа килергә икәнлеге тураһында мәғлүмәтте күрәсәкһегеҙ.

Бынан тыш, һеҙгә фотоға төшөргә кәрәк буласаҡ. Миграция буйынса бүлексәгә ике тапҡыр килергә тура киләсәк. Беренсе тапҡыр – документтарҙың төп нөсхәһен тапшырыу өсөн, икенсеһендә – әҙер документты алырға.

Иҫегеҙгә төшөрәбеҙ: иҫке өлгөләге (5 йылға) сит ил паспорты алыу өсөн дәүләт пошлинаһы 2000 һум тәшкил итә, 14 йәшкә тиклемге балалар өсөн – 1000 һум.

Дәүләт хеҙмәтен күрһәтеү срогы ғариза биргән, шул иҫәптән Берҙәм портал аша электрон документ тапшырған көндән башлап һанала.

Федераль миграция хеҙмәтенә шәхсән мөрәжәғәт иткәндә ғариза биреү көнө булып дөрөҫ итеп тултырылған документтар-ҙы (ғариза менән ҡушымталарын) тапшырған көн иҫәпләнә. Берҙәм портал аша электрон документ итеп тапшырғанда ғаризаны биреү көнө булып ғариза биреүсегә ғаризаһы ҡабул ителеү тураһында электрон хәбәр ебәрелгән көн иҫәпләнә. Сит ил паспортын әҙерләү срогы:

- йәшәгән урын буйынса документтар тапшырғанда – бер ай;

- ғариза биреүсенең йәшәгән урыны буйынса булмаһа (килгән урын буйынса) – дүрт ай;

- айырыуса мөһим мәғлүмәттәр йәки серле мәғлүмәттәргә эйә булған ғариза биреүсегә – өс ай;

- тиҙ арала дауалау, ауыр сир йәки яҡын туғандың үлеме менән бәйле һәм Рәсәй Федерацияһынан ситкә сығыуҙы талап иткән шарттарҙа документтар ярҙамында раҫланған осраҡта – өс эш көнөндә”.