Өйҙә көткәндәр хаҡына

Атаһын хәтерләмәй, сөнки малай дүрт йәшлек кенә сағында ул вафат була. Сыҙамлыҡ өлгөһө күрһәтеп, әсәһе улын бер үҙе тәрбиәләй. Өләсәй-олатаһы менән бергә улар ауырлыҡтарҙы еңеп сығалар, ә һуңынан йорт һатып алалар һәм үҙ хужалыҡтарын булдыралар. Уҡыу еңелдән бирелмәй: һигеҙенсе класҡа тиклем – Ҡорғат мәктәбендә, һуңынан туғыҙынсыға ҡәҙәр Оло Ыҡтамаҡ ауылының Башҡорт гимназияһында уҡый. Дыуан күп профилле колледжында электромонтёр һөнәрен алып, ул тыныс тормошҡа әҙер була, әммә яҙмыш башҡаса йүнәлеш бирә.
2020 йылда уны армияға саҡыралар. Ҡазан юғары танк училищеһында хеҙмәт итеү холоҡ-фиғелен нығыта. Өсөнсө класлы танкта тоҫҡаусы-оператор армиянан саҡырыуҙарға әҙер белгес булып ҡайта. Ә 2023 йылдың декабрендә Рәсәй Оборона министрлығы менән контракт төҙөргә ҡарар итә һәм махсус хәрби операция зонаһына юллана. Тәүге көндәрҙән үк ул “Сомали” айырым штурм батальонына (60-сы айырым гвардия мотоуҡсылар батальоны) эләгә. Алғы һыҙыҡта “Крест” ышаныс символына әүерелә. Хәҙер ул механизацияланған ротаның танк командиры вазифаһында гвардия ефрейторы дәрәжәһендә хеҙмәт итә.
Яҡташыбыҙҙың таянысы һәм көс сығанағы – уны бер үҙе тәрбиәләгән әсәһе һәм бәләкәй улы Костя. Өйҙә иң яҡын кешеләренең көтөүе хаҡында уйы яугирға бер нәмәгә ҡарамай алға барырға көс бирә.
Улы тураһында һөйләгәндә, яугирҙың әсәһе хәүефләнеп телефон экранына ҡарап-ҡарап ала, унда – хәрби хәрәкәттәрҙән кадрҙар. Ул үҙҙәренә нисек ауырға тура килгәнен, улына бөтә кәрәкле нәмәне бирергә тырышҡанын иҫенә төшөрә. Хәҙер әсә йөрәге улының ҡыйыулығы өсөн ғорурлыҡ тойғоһо менән тулы, шул уҡ ваҡытта ғәзизенең ғүмере өсөн ҡурҡыуҙан өҙгөләнә. Ул ауырлыҡтар артта ҡалыр тип өмөтләнә, иң мөһиме – барыһы ла иҫән-һау булһын, ә ҡалғанын кисереп сығырға мөмкин.
– Минең төп таянысым – ул, әлбиттә, әсәйем, улым, шулай уҡ хәрби иптәштәрем. Тап улар мине бирешмәҫкә һәм аҙағынаса барырға дәртләндерә! Һеҙгә, айырыуса туғандары фронтта булғандарға түҙемлек һәм тыныслыҡ теләйем. Ә хеҙмәттәштәремә – рух көсө, сөнки еңеү яҡын. Киләсәккә пландарым аныҡ: иҫән ҡайтып, улымды тәрбиәләү һәм тыныс тормош менән йәшәү, – ти яугир.
Рәмил МАЙҘАНОВ.