Тәмлееее генә ҡарағат вәринйәһе!

Шөкөр, йәй емештәрен дә ауыҙ итә башланыҡ. Ҡайын еләге тамылйып бешә, ҡарағат та өлгөрөп килә. Ҡайһы берәүҙәр ҡайнатҡанда ҡарағат емештәре бөршәйә лә ҡуя, тип зарлана. Бәлки, ошо рецепт ярҙам итер.

11 стакан ҡарағатҡа 14 стакан шәкәр ҡомо алына. Йәнә ике стакан һыу кәрәк.

2 стакан һыуға 7 стакан шәкәр һалып, ул иреп бөткәнсе сироп ҡайнатабыҙ. Ҡайнап торған сиропҡа ҡарағат һалына. Йәнә ҡайнатып сығарып, утта 10 минут тотабыҙ. Унан уттан алырға кәрәк. Ҡалған 7 стакан шәкәрҙе ҡушып, 10 минут самаһы яҡшылап болғатабыҙ. Шәкәр иреп бөтөргә тейеш. Унан инде ҡайнатманы ҡайнар ғына килеш стерилләнгән банкаларға тултырырға ғына ҡала.

Йәй емештәрен әҙерләп өлгөрәйек, дуҫтар!

Тансылу Багаутдинова