Музыка берләштерә

“Тембр” өлгөлө йыр ансамбле беҙҙең районда төрлө милләт вәкилдәренең дуҫтарса хеҙмәттәшлегенә сағыу өлгө булып тора. Ансамбль 2009 йылда Балалар сәнғәт мәктәбе хор бүлегенең кесе төркөмө базаһында барлыҡҡа килә. 2015 йылда ул район Мәҙәниәт һарайы ҡарамағына күсә. Ансамблдең ойоштороусыһы һәм алыштырғыһыҙ етәксеһе – Фәриҙә Ғәйнанова.
– Коллектив һәр ваҡыт төрлө милләтле һәм бик татыу. Ансамблдең тәүге составында биш милләт вәкилдәре сығыш яһаны: башҡорт, татар, рус, украин һәм әрмән. Ҡатнашыусыларҙы репетициялар һәм сығыштар берләштерә. Беҙ бер ҙур ғаилә. Хәҙер “Тембр” ансамбле составына Арыҫлан Байышев, Асҡар Хәйерзаманов, Арыҫлан Әхмәтйәнов, Арсен Мазманян, Әсҡәт Хәйерзаманов, Карен Аветян, Корюн Ханагян, Мкртич Чинорян, Самир Латипов, Трофим Крючков, Тамерлан Воронин, Арсений Хажиморатов инә, – тип һөйләй Фәриҙә Сәлимйән ҡыҙы.
Ошо 15 йыл эсендә “Тембр” райондың ижади коллективы ғына түгел, ә ысын йөрәге булды. Унда төрлө халыҡ вәкилдәре бергә эшләргә өйрәнә, үҙ сиратында ғәжәйеп аһәңле гармония булдыра һәм был уларҙың сығыштарын тулыландыра. Һәр концертта улар музыканың йөрәктәрҙе берләштерә алыуын күрһәтә. Ансамблдең репертуарында рус һәм башҡорт телдәрендә эстрада йырҙары бар.
– Ансамблде нәҡ күп төрлө милләттәр үҙенсәлекле итә. Сөнки һәр егет уға үҙенсәлек индерә. Был күп милләтле районыбыҙҙың рухын сағылдырыусы бай һәм төрлө музыкаль репертуар булдырырға мөмкинлек бирә, – тип уртаҡлаша етәксе.
Коллектив күп тапҡыр республика һәм Бөтә Рәсәй конкурстарында ҡатнашҡан һәм лауреат булған. Бихисап грамоталар һәм дипломдар “Тембр” йыр ансамбле ағзаларының юғары оҫталыҡ кимәле һәм егеттәрҙең өлгәшкән уңыштары тураһында һөйләй. Шулай итеп, Дыуан районында үткән Ватанды һаҡлаусылар көнөнә арналған ир-егеттәр ансамблдәренең VIII зональ конкурсында улар почетлы беренсе урын алды. Өфө ҡалаһының балалар һәм профессиональ вокал-хор ансамблдәренең III асыҡ зональ конкурс-фестивалендә улар дипломант булды.
Мәсетле районы һәр яңы нота менән дуҫлыҡ һәм берҙәмлек ҡиммәттәрен раҫлаған “Тембр” өлгөлө вокаль ансамбле менән ғорурланырға хаҡлы.
Ләйсән АБЗАНОВА.