Бергәләп күңелле

Тәбрикләү телмәре менән Мәсетле районы хакимиәтенең йәштәр сәйәсәте буйынса баш белгесе Гөлдәр Солтанова мөрәжәғәт итте. 2024 йылғы “Атай ҡаһарманлығы” йәмәғәт наградаһы номинанттары Юрис Латыпов һәм Айнур Зәбихуллин барыһын да байрам менән ҡотлап, ныҡлы һаулыҡ, рух күтәренкелеге һәм уңыштар теләне.
“Беренселәр хәрәкәте” активистары концерт номерҙары менән сығыш яһаны. Сараны ойоштороусылар: Мәсетле районы хакимиәтенең йәштәр сәйәсәте һәм спорт бүлеге, Йәштәр үҙәге, “Беренселәр хәрәкәте”нең урындағы бүлексәһе, “Ғаилә” үҙәге, Йәштәр советы, “Өмөт” йәш ғаиләләр клубы, район Мәҙәниәт һарайы.
Байрам интеллектуаль уйын-викторина форматында ойошторолдо. Атайҙар һәр төрлө һорауҙарға яуап бирҙе, улдары һәм ҡыҙҙары менән ҡағыҙҙан ат һындары яһаны, күҙҙәрен бәйләп ҡулдар буйынса үҙ балаларын таныны. Блиц-һорау алыу барышында ҡатнашыусыларҙың ҡайһыһы балаһының холоҡ-фиғелен яҡшыраҡ белеүе асыҡланды.
Сара иҫтә ҡалырлыҡ булды. Уйын йомғаҡтары буйынса беренсе урынға Яңы Мишәр ауыл биләмәһенән Ғәниевтар ғаиләһе лайыҡ булды, икенсе урынға – Яңы Яуыш ауыл биләмәһенән Нәбиуллиндар, өсөнсө урынды Оло Ыҡтамаҡ ауыл биләмәһенән Ямалетдиновтар яуланы.
Еңеүселәр диплом һәм аҡсалата сертификат менән бүләкләнде, башҡаларға ҡатнашыусы сертификаттары тапшырылды, ә балалар татлы бүләктәр алды.
Екатерина ӘМИРОВА.