Башҡортостан Хөкүмәтендә КФҮ иң яҡшы хеҙмәткәрҙәрен бүләкләнеләр

Ҡотлау телмәре менән сығыш яһап, Александр Гагин КФҮ хеҙмәткәрҙәре эшенең әһәмиәтен һыҙыҡ өҫтөнә алды:
– Күп функциялы үҙәк эшләй башлағандан алып Башҡортостанда йәшәгән һәр кемдең тормошоноң айырылғыһыҙ өлөшө булды. Төбәктә илдә иң ҙур һәм иң һөҙөмтәле селтәрҙәрҙең береһе төҙөлдө. Әммә Күп функциялы үҙәктәрҙең төп ҡаҙанышы һәм ҡиммәте – граждандарға иң мөһим мәсьәләләрҙе хәл итергә ярҙам итеүсе хеҙмәткәрҙәр, – тип билдәләне ул.
Бөгөн Башҡортостандың Күп функциялы үҙәк селтәре 77 офисты, 46 территориаль яҡтан айырымланған структур бүлексәне һәм 366 күсмә хеҙмәтләндереү пунктын берләштерә, республика халҡының 99,14% хеҙмәтләндерә. Үҙәктәрҙә 1200-гә яҡын универсаль белгес эшләй, улар көн һайын 10 меңгә яҡын ғариза биреүсене ҡабул итә. 15 йыл эшләү дәүерендә КФҮ хеҙмәткәрҙәре 67 миллиондан ашыу мөрәжәғәт эшкәрткән.
Әлеге ваҡытта Күп функциялы үҙәк 256 ведомство һәм ойошма менән үҙ-ара эш итә. Һәр офиста социаль әһәмиәтле дәүләт, муниципаль һәм башҡа хеҙмәттәрҙең 500-гә яҡын төрө бар. Хеҙмәттәр, ғариза биреүсенең теркәлгән һәм йәшәгән урынына ҡарамаҫтан, экстерриториаль принцип буйынса күрһәтелә.
Айырым эш йүнәлеше – махсус хәрби операцияла ҡатнашыусыларға һәм уларҙың ғаиләләренә ярҙам итеү. Башҡортостан илдең бөтә төбәктәре өсөн РФ Оборона министрлығы нигеҙ итеп алған ярҙам сараларын комплекслы хәл итеү практикаһын тәҡдим итте. Бөгөн үҙәктә 69 ярҙам сараһын рәсмиләштерергә мөмкин (сағыштырыу өсөн: 2022 йылда улар 7 ине), шулай уҡ тейешле льготалар тураһында шәхси мәғлүмәт биреү сервисынан файҙаланырға була.
Республиканың Күп функциялы үҙәк селтәренең эше федераль кимәлдә даими билдәләнә. Төбәк селтәре һәм уның хеҙмәткәрҙәре бер нисә тапҡыр “Рәсәйҙең иң яҡшы Күп функциялы үҙәк” Бөтә Рәсәй конкурсында еңеүсе тип табылды.
Тантаналы сара Башҡортостан Республикаһы Хөкүмәте Аппаратының Күп функциялы үҙәк хеҙмәткәрҙәренә рәхмәт хаттары тапшырыу менән тамамланды. Бүләкләнеүселәр араһында Оло Ыҡтамаҡ ауылындағы “Минең документтарым” офисының операциялар залының баш белгесе Таңһылыу Ғәниева ла бар.