Ветеринар – шәфҡәтле һәм кәрәкле һөнәр

Райондың бөтә торлаҡ пункттарындағы йорт хайуандары уларҙың хеҙмәтләндереү зонаһына инә. Ветеринар хеҙмәте ҡуйылған бурыстарҙы ваҡытында уңышлы үтәй – малдарҙы вакцинациялау буйынса бөтә профилактик сараларҙы сифатлы һәм билдәләнгән ваҡыт эсендә башҡара, хәүефле сирҙәрҙең таралыуына юл ҡуймау өсөн ваҡытында малдарҙы ҡарай һәм дауалай.
Ветеринария хеҙмәте коллективы берҙәм һәм ышаныслы, араларында тәжрибәле ветерандар һәм һәләтле йәштәр ҙә бар.
Ағымдағы йылда ветеринария хеҙмәтендә үҙгәрештәр ҙә булды. 8 августан ветеринария хеҙмәте начальнигы вазифаһын Наил Мөхәмәтйәнов баш-ҡара. Был тармаҡта ул 1997 йылдан алып эшләй. Оҙаҡ йылдар хеҙмәт итеү осоронда төрлө вазифалар биләй: ветеринария санитары һәм фельдшеры, мал табибы-терапевт, эпизоолог. Ул – белемле, һәләтле белгес, үҙ эшенең оҫтаһы.
Ветеринария хеҙмәтендә Эльвира Ғәлимйәнова ла иң яҡшы белгестәр-ҙең береһе. Ул ветеринар-санитар экспертиза лабораторияһы мөдире вазифаһын башҡара. Ит продукцияларына тамға һуға һәм һатыуға рөхсәт бирә, Оло Ыҡтамаҡ ауылы баҙарында санитария шарттарын үтәүҙе ҡәтғи контролдә тота. Эльвира Рифат ҡыҙы намыҫлы хеҙмәткәр, үҙ бурыстарын теүәл үтәй. Юғары һөнәри сифаттары өсөн Башҡортостан Республикаһы Ауыл хужалығы министрлығының Почет грамотаһы менән бүләкләнгән.
Районда ун ветеринар участкаһы бар. Иң тәжрибәле белгестәр Дыуан-Мәсетле участкаһында эшләй: Винер Хәсәнов – мал табибы, Фуат Ғәлимов – ветеринария фельдшеры. Улар Дыуан-Мәсетле, Туҡбай, Бурансы, Ғүмәр, Йыланыш һәм Ҡаранай ауылдарын хеҙмәтләндерә. Үҙ эшен яратып башҡарған, намыҫлы һәм яуаплы хеҙмәткәрҙәрҙе ауыл халҡы ихтирам итә.